Дзяржаўная дума РФ забараніла «замежным агентам» удзельнічаць у выбарах

Ініцыятыву ўхвалілі 406 дэпутатаў.

Дзяржаўная Дума РФ аднагалосна прыняла ў другім і трэцім чытанні папраўкі аб забароне "замежным агентам" удзельнічаць у расейскіх выбарах усіх узроўняў, паведамляе ТАСС.

Ініцыятыву адобрылі 406 дэпутатаў. Папраўкі будуць унесены ў закон "Аб асноўных гарантыях выбарчых правоў і права на ўдзел у рэферэндуме грамадзян РФ". Ён будзе дапоўнены нормай аб тым, што "кандыдат абавязаны да моманту прадстаўлення дакументаў, неабходных для рэгістрацыі кандыдата, спісу кандыдатаў, спыніць статус замежнага агента".

Гэта парадак распаўсюджваецца на выбары ў федэральныя і рэгіянальныя органы дзяржаўнай улады, органы публічнай улады федэральнай тэрыторыі і органы мясцовага самакіравання. У той жа час зарэгістраваны кандыдат не можа быць уключаны ў рэестр "замежных агентаў".

Мяркуецца, што паўнамоцтвы "замежных агентаў" у органах улады спыняцца праз 180 дзён пасля ўступлення закона ў дзеянне, калі іх дагэтуль не выключаць з адпаведнага рэестра. Паўнамоцтвы дэпутатаў і губернатараў, якія сталі "замежнымі агентамі", таксама спыняць датэрмінова. Акрамя таго, "замежныя агенты" не змогуць прэтэндаваць на пасаду сэнатара ў Савеце Федэрацыі.

Таксама асобам, уключаным у рэестр "замежных агентаў", будзе забаронена станавіцца назіральнікамі і даверанымі асобамі кандыдатаў на выбарах.