Беларускі рэжым адпрацуе выкарыстанне ядзернай зброі

(абноўлена) Лукашэнка далучыўся да вучэнняў Расеі.

Рэжым Лукашэнкі пачаў раптоўную праверку сродкаў-носьбітаў нестратэгічнай ядзернай зброі.

“У рамках гэтага мерапрыемства праведзенае перабазаванне часткі сіл і сродкаў авіяцыі на запасны аэрадром. З наступным перабазаваннем тэхнічнага складу мы прыступім да пытанняў адпрацоўкі падрыхтоўкі да выкарыстання нестратэгічнай ядзернай зброі”, - заявіў генерал-маёр Віктар Гулевіч.

У гатоўнасць прыведзены «Іскандэры» і эскадрылля Су-25.

“У гатоўнасць да выканання задач па прызначэнні прыводзіцца дывізіён аператыўна-тактычнага комплексу “Іскандэр” і эскадрылля самалётаў Су-25. Праверка будзе праведзеная ў адпаведнасці строга з рэгламентам часу, устаноўленым Лукашэнкам. Падчас яе будзе правераны ўвесь комплекс мерапрыемстваў ад планавання, падрыхтоўкі і прымянення ўдараў тактычнымі ядзернымі боепрыпасамі”, - заявіў кіраўнік Мінабароны Беларусі Віктар Хрэнін.

Нагадаем, Міністэрства абароны Расеі заявіла, што на даручэнне Пуціна "найбліжэйшым часам" правядзе вучэнні аб прымяненні тактычнай ядзернай зброі.

Вайскоўцы РФ паведамілі, што падчас вучэнняў будзе ажыццёўлены комплекс мерапрыемстваў у практычнай адпрацоўцы пытанняў падрыхтоўкі і выкарыстання нестратэгічнай ядзернай зброі.