Google прапанаваў тэхналогію ШІ для пошуку новых лекаў
2- 8.05.2024, 20:30
- 2,356
Падрабязнасці.
Google Deepmind прапанавала трэцюю асноўную версію сваёй мадэлі штучнага інтэлекту «AlphaFold», распрацаванай, каб дапамагчы навукоўцам знаходзіць лекі і больш эфектыўна змагацца з хваробамі.
Пра гэта паведамляе Reuters.
У 2020 годзе кампанія дасягнула значнага прагрэсу ў малекулярнай біялогіі, выкарыстоўваючы ШІ для паспяховага прагназавання паводзінаў мікраскапічных бялкоў.
Дзякуючы апошняму ўвасабленню AlphaFold даследнікі з DeepMind і даччынай кампаніі Isomorphic Labs, якімі кіруе сузаснавальнік Дэміс Хасабіс, адлюстравалі паводзіны ўсіх малекулаў жыцця, уключаючы ДНК чалавека.
У DeepMind заявілі, што новы ШІ скароціць час і грошы, неабходныя для распрацоўкі метадаў лекавання, якія патэнцыйна могуць змяніць жыццё.
«Дзякуючы гэтым новым магчымасцям мы можам сканструяваць малекулу, якая будзе звязвацца з пэўным месцам бялку, і мы можам прадказаць, наколькі трывала яна будзе звязвацца», – сказаў Хасабіс.
Кампанія таксама абвясціла пра выпуск «сэрвера AlphaFold», бясплатнага анлайн-інструмента, які навукоўцы могуць выкарыстоўваць для праверкі сваіх гіпотэзаў перад правядзеннем тэстаў у рэальным свеце.
У DeepMind заявілі, што новы сэрвер патрабуе менш кампутарных ведаў, дазваляючы даследнікам запускаць тэсты за ўсё некалькімі націскамі кнопкі.
Экспертка ў мікрабіялогіі з Універсітэта Бірмінгема доктарка Ніколь Уілер сказала, што AlphaFold 3 можа значна паскорыць працэс адкрыцця лекаў.
«Паколькі фізічная вытворчасць і тэставанне біялагічных канструкцый цяпер з'яўляецца вялікім вузкім месцам у біятэхналогіі», – растлумачыла яна.