Расея стварае групоўку войскаў у Курскай вобласці: названая мэта

Атрыманыя звесткі ад украінскай і заходніх выведак.

Расея стварае групоўку войскаў у Курскай вобласці для патэнцыйнага наступу з поўначы на Харкаўскую вобласць Украіны. Гэтых сіл і сродкаў недастаткова для правядзення маштабнай наступальнай аперацыі. Аднак поўнасцю выключаць такую магчымасць нельга.

Такое меркаванне агучыў ваенна-палітычны экспэрт Дзмітрый Снегіроў у эфіры тэлеканала FREEДОМ сёння, 9 траўня.

«На гэты момант на прымежных з Украінай тэрыторыях РФ засяроджана блізу 30 тысяч асабовага складу войска акупантаў. Гэтай колькасці недастаткова для правядзення шырокамаштабнай наступальнай аперацыі. Але цалкам выключаць магчымасць наступу ў Харкаўскай вобласці нельга», - адзначыў Снегіром.

На 9 траўня, са звестак Галоўнай управы выведкі Міністэрства абароны Украіны і заходніх выведвальных супольнасцяў на тэрыторыі Расейскай Федэрацыі не зафіксавана фармавання так званага кантынгенту ўварвання, дапоўніў спікер.

«Тры асноўныя паказчыкі падрыхтоўкі ўварвання: перадыслакацыя асабовага складу, БК, другое - перадыслакацыя цяжкай бранятэхнікі, трэцяе - разгортванне палявых шпіталяў. Трох складнікаў на гэты момант не фіксуецца. Адпаведна, відавочна, гаворка ідзе аб павелічэнні групоўкі з мэтай расцягнуць намаганні Узброеных сіл Украіны на прыкрыццё магчымых адцінкаў расейскага прарыву», - мяркуе экспэрт.

Паводле ягоных слоў, расейцы выкарыстоўваюць тактыку так званых «тысячы парэзаў» — спробы адначасовых удараў на некалькіх кірунках.

«Але галоўная іх мэта - адцягнуць аператыўныя рэзервы Узброеных сіл Украіны з Данецкага кірунку, у тым ліку з Часовага Яра і з Пакроўскага кірунку», - падкрэсліў спікер.