Упершыню ў гісторыі еўрапейца тройчы прызналі найлепшым гульцом НБА

Ім стаў цэнтравы «Дэнвера» Нікола Ёкіч.

Сербскі цэнтравы «Дэнвера Нагетса» Нікола Ёкіч трэцім разам за апошнія чатыры гады быў прызнаны самым каштоўным гульцом сезона ў НБА, ён стаў усяго дзявятым баскетбалістам у гісторыі турніру і першым еўрапейцам, які атрымаў гэтую ўзнагароду тры разы. Пра гэта паведамляецца на сайце НБА.

Найлепшы гулец лігі з мінулага сезона атрымлівае прыз імя Майкла Джордана.

У рэгулярным сезоне Ёкіч стаў 10-м у НБА па балах, чацвёртым у падборах і трэцім у перадачах за гульню. Ёкіч заняў другое месца па колькасці дабл-даблаў (68) і трыпл-даблаў (25) і рэалізаваў 58,3% кідкоў з гульні (дзясяты вынік).

Ён другі гулец у гісторыі лігі пасля Оскара Робертсана (1962), які набраў не менш за 2000 балаў, зрабіў 900 падбораў і 700 перадач за сезон.

Раней серб атрымліваў узнагароду ў 2021 і 2022 гадах.

Акрамя Ёкіча і амерыканца Лары Берда (па тры ўзнагароды), астатнімі ўладальнікамі тытула MVP па тры разы і больш станавіліся толькі цемнаскурыя баскетбалісты — Карым Абдул-Джабар (6), Майкл Джордан (5), Біл Расэл (5), Уілт Чэмберлен (4), Леброн Джэймс (4), Мэджык Джонсан (3) і Мозэс Мэлоўн (3).

«Дэнвер» з Ёкічам у гэтым сезоне ўстанавіў клубны рэкорд па колькасці перамог за «рэгулярку» (57 перамог, 25 паразаў).

У другім раундзе плей-оф клуб Ёкіча гуляе з «Мінесотай Цімбервулвз» (0–2).