За памяць пра камуністычныя рэпрэсіі – пад суд
2- 31.10.2007, 12:14
Учора ў Віцебску падчас акцыі, прысвечанай Дню памяці продкаў "Дзяды", адбыліся масавыя затрыманні дэмакратычных актывістаў. Затрыманыя 25 чалавек. Акцыя праходзіла ў вёсцы Паляі, якая знаходзіцца прыкладна ў 15 кіламетрах ад горада. Недалёка ад гэтай вёскі ёсць месца, дзе, паводле звестак мясцовых жыхароў, у 30-я гады мінулага стагоддзя НКВД расстрэльваў прадстаўнікоў віцебскай інтэлігенцыі.
Падчас правядзення жалобнага мерапрыемства з’явіліся міліцыянты, якія папрасілі ўсіх праехаць у РАУС. Пасля праверкі дакументаў большасць людзей адпусцілі. Пяць чалавек, якія трымалі падчас акцыі бел-чырвона-белыя сцягі, былі дастаўленыя ў суд Віцебскага раёна.
У той жа дзень Барыс Хамайда і Ян Таўпыга былі прызнаныя вінаватымі ў арганізацыі несанкцыянаваных масавых дзеянняў і пакараныя адміністрацыйнымі штрафамі ў памеры 20 базавых велічыняў.
Суды над Сяргеем Каваленкам і Змітром Якаўлевым адбудуцца сёння, над Сяргеем Белязекам — 6 лістапада.
