Удзельнікаў Хэлоўіна другія суткі трымаюць за кратамі

Удзельнікаў Хэлоўіна Таццяну Лашкарову, Андрэя Кіма, Валянціна Сакалоўскага і Юрыя Шаліна не вызвалілі да суду з Савецкага суду Менска. Маладыя людзі другія суткі знаходзяцца пад вартай і судзіць іх будуць толькі 2 лістапада. Пра гэта прэс-цэнтру Хартыі’97 паведамілі ў спецпрыёмніку-размеркавальніку на Акрэсціна, куды ўдзельнікаў Хэлоўіна прывезлі 1 лістапада пасля 21.00. Да гэтага яны правялі ноч і дзень у РУУС Савецкага раёна.

Такім чынам, людзей без суду пратрымалі такі працяглы тэрмін пад вартай толькі за ўдзел у нявіннай забаве, у жартоўным свяце, які адзначае ўвесь свет!

Нагадаем, маладыя людзі былі затрыманыя 31 кастрычніка прыкладна ў 19.30 і дастаўленыя ва УУС Савецкага раёна сталіцы.

Група маладых людзей (прыкладна 15–20 чалавек), надзеўшыся ў карнавальныя касцюмы, збіралася павіншаваць жыхароў Менска з Хэлоўінам. Акцыя не мела ніякага палітычнага падтэксту.

Супрацоўнікі міліцыі затрымалі чацвярых удзельнікаў акцыі, апранутых у касцюмы мумій, а таксама журналіста "Нашай Нівы" Яраслава Сцешыка, які здымаў тое, што адбываецца на фотакамеру. Паводле сведчання Я.Сцешыка, міліцыянты заявілі, што маладыя людзі ў касцюмах мумій падобныя на злачынцаў, якія нібыта знаходзяцца ў вышуку. Журналісту, у сваю чаргу, заявілі, што ён не мае права весці фотаздымку і таксама падобны на фотаробат злачынца.

Пасля разгляду Сцешыка вызвалілі без складання пратаколу. У дачыненні чатырох удзельнікаў карнавальнай акцыі – Шаліна, Сакалоўскага, Кіма і Лашкаровай – складзеныя пратаколы па артыкуле 17.1 КаАП (дробнае хуліганства).

У пратаколе, па словах журналіста "Нашай Нівы", запісанае, што маладыя людзі раскладвалі на прылаўках бінты і не рэагавалі на заўвагі прадаўцоў, тым самым выказаўшы "непавагу да грамадства". Аднак затрыманыя заявілі, што ўсё было зусім не так. Напрыклад, яны не раскладвалі бінты на прылаўках, а наадварот намотвалі іх адзін на аднаго, ператвараючыся ў мумій. У выніку яны не згадзіліся з пратаколамі і адмовіліся іх падпісваць. Пасля чаго ім было абвешчанае, што яны застануцца ў аддзяленні да раніцы.

Нагадаем, таксама, што 31 кастрычніка з Кастрычніцкай плошчы Менска былі груба выцесненыя супрацоўнікамі АМАПа ўсе, хто выйшаў у свята Хэлоўіна на вуліцы Менска ў карнавальных касцюмах.

Фота "Наша Ніва"