Як выглядае дом беларускага патрыёта? (Фотафакт)
5
16:37, — Общество
Улады Клецку забаранілі сэрыю пікетаў супраць адмены ільготаў. Акцыя адбылася ў іншым фармаце.
Ініцыятарам пікетаў выступіў Сяргей Панамароў, мясцовы актывіст і выдавец незалежнага бюлетэню «Бойкі Клецк». Усяго 30 верасьня павінна было прайсьці 4 пікеты, кожны зь іх мусіў адбыцца побач з дамамі заяўнікаў. У адмове, падпісанай старшынём райвыканкаму Анатолем Бойкам, гаварылася, што перш чым падаваць заяўку на пікет, неабходна было вырашыць гэтае пытаньне з праваахоўнымі органамі, мэдычнай установай і пажарнымі ды аплаціць іхныя паслугі.
У выніку акцыя прайшла ў іншай форме: клецкія актывісты наладзілі раздачу бюлетэню. Варта адзначыць, што да 16-й гадзіны каля дому С. Панамарова знаходзіўся міліцэйскі пост, а за ім самім у часе раздачы «БК» хадзіў патруль. Пасьля 16-й, калі міліцыянты зьехалі, сп. Панамароў узьняў над сваім жытлом двухмэтровы бел-чырвона-белы сьцяг. Міліцыянты так і не наважыліся яго зьняць.
Нагадаем, што супраць Сяргея Панамарова Клецкай пракуратурай распачатая крымінальная справа паводле ч.2 арт. 188 КК РБ (паклёп у друкаваных сродках). Кіраўніца Клецкай юрыдычнай кансультацыі Натальля Семашкевіч палічыла абразьлівай інфармацыю ў адным з артыкулаў, надрукаваным у «Бойкім Клецку».
