Россия была единственным адвокатом белорусских властей в ПАСЕ
4
10:12, — Политика
Как проходила дискуссия после доклада по Беларуси депутата ПАСЕ Христоса Пургуридеса, который политик представил во время сессии Парламентской ассамблеи Совета Европы?
Пра гэта журналіст “Радыё Свабода” Юры Дракахруст размаўляе з карэспандэнтам Данілам Гальпяровічам, акрэдытаваным на сэсіі Парлямэнцкай асамблеі Рады Эўропы ў Страсбуры.
- Напярэдадні адзін з кіраўнікоў расейскай дэлегацыі Канстанцін Касачоў заявіў, што Расея будзе дабівацца на сэсіі вяртаньня Беларусі ў Раду Эўропы. Наколькі гэта ўдалося?
- Акрамя Канстанціна Касачова ахвотных выступіць ад расейскай дэлегацыі адносна злоўжываньняў у крымінальнай сыстэме Беларусі знайшлося шмат. Выступілі два прадстаўнікі ЛДПР, некалькі прадстаўнікоў кампартыі. Атрымалася так, што Расея была адзіным адвакатам беларускіх уладаў.
- Якія асноўныя тэзы гэтага дакладу, прадстаўленага юрыдычнай камісіяй асамблеі?
- Там гаворыцца, што камісія “глыбока шкадуе аб шматлікіх фактах палітычна матываваных злоўжываньняў у сыстэме правасудзьдзя, якія мелі і па-ранейшаму маюць месца ў Рэспубліцы Беларусь”. Насамрэч гэта крыху дыпляматычныя словы, але сам даклад дастаткова цьвёрды. Асабліва абурыла асамблею тое, што арыштоўвалі за распаўсюджваньне дакладу самой ПАРЭ аб зьнікненьні ў Беларусі людзей.
У дакладзе гаворыцца, што палітычных апанэнтаў беларускай улады садзяць у турму на адвольных падставах, у прыватнасьці па крымінальных артыкулах, абвінавачваючы ва ўхіленьні ад сплаты падаткаў ці ў махлярстве, гаворыцца таксама пра тое, што працягваецца перасьлед палітычных апанэнтаў Аляксандра Лукашэнкі.
- Як праходзіла дыскусія, ці пярэчыў хто тэзам дакладу?
- Пярэчаньні былі толькі з боку расейскіх дэпутатаў. Леанід Слуцкі, адзін з кіраўнікоў камітэту Дзярждумы па міжнародных справах, казаў, што Хрыстасу Пургурыдэсу трэба падумаць, як бы ён паставіўся да таго, што кіпрскую апазыцыю нехта фінансаваў бы з-за мяжы. Камуністка Сьвятлана Гарачава казала, што нельга разглядаць такі даклад без прадстаўнікоў Беларусі і папрасіла даведацца, ці запрашаліся прадстаўнікі Беларусі, каб паўдзельнічаць у дыскусіі.
- А якім быў вынік дыскусіі?
- Выступы расейскай дэлегацыі ў абарону афіцыйнай Беларусі не перашкодзілі Парлямэнцкай асамблеі Рады Эўропы ўхваліць даклад, які зрабіў Хрыстас Пургурыдэс. А ў ім сярод рэкамэндацыяў, якія даюцца беларускім уладам, – адмяніць закон 71-3 ад сьнежня 2005 году, так званы “антырэвалюцыйны закон”, і ў прыватнасьці 193-ы артыкул Крымінальнага кодэксу, які абвяшчае крымінальным злачынствам дзейнасьць ад імя незарэгістраванай арганізацыі.
Таксама прапануецца Эўразьвязу і ЗША працягваць ужываць адрасныя санкцыі адносна тых беларускіх службовых асобаў і арганізацыяў, якія перасьледуюць іншадумцаў. Прапаноўваецца замарожваць рахункі гэтых арганізацыяў і асобаў, адмаўляць ім у візах і г.д.
- Каму ўсё ж збольшага адрасаваныя рэкамэндацыі асамблеі?
- Відавочна, што Рада Эўропы не спадзяецца на якія б там ні было заклікі да беларускіх уладаў. Яна зьвяртаецца не да іх, а да асобаў, да судзьдзяў, пракурораў, супрацоўнікаў міліцыі, іх заклікаюць быць мужнымі і не выконваць таго, што можна назваць злачыннымі загадамі, ня ўдзельнічаць у процізаконным перасьледзе апазыцыянэраў.
Кіраўніцтва Рады Эўропы, большасьць краінаў Рады Эўропы страцілі надзею дамовіцца пра тое, каб беларускія ўлады пачалі па-сапраўднаму зь імі супрацоўнічаць. Нядаўна старшыня Парлямэнцкай асамблеі Рады Эўропы Люіс Марыя дэ Пуч сказаў, што ў сваіх размовах з кіраўніцтвам Беларусі ён не заўважыў якога б там ні было жаданьня лідэраў гэтай краіны далучыцца да такой арганізацыі, як Рада Эўропы.
Нагадаем, наконадні Парлямэнцкая асамблея Рады Эўропы ўхваліла рэзалюцыю аб злоўжываньнях у сыстэме крымінальнага правасудзьдзя Беларусі. Ва ўхваленай рэзалюцыі ПАРЭ заахвочвае Эўразьвяз і ЗША да ўвядзеньня новых санкцыяў у адносінах да беларускіх чыноўнікаў, адказных за сур’ёзныя парушэньні правоў чалавека.
