У накрытым лавінай італьянскім гатэлі знайшлі тых, хто выжыў

Ратавальнікі працуюць над тым, каб вызваліць пацярпелых са снежнага палону.

Італьянскія ратавальнікі паведамілі, што знайшлі шэсць чабавек, якія выжылі на месцы сходу лавіны на гатэль «Рыгапьяна» ў курортнай зоне Гран-Сасо ў Апенінах. Гэта першыя з трох дзясяткаў чалавек, якія лічацца зніклымі без вестак, паведамляе расейская служба BBC.

«Яны жывыя, і мы гаворым з імі», - сказаў прадстаўнік пажарнай службы Лука Кары. Ратавальнікі працуюць над тым, каб вызваліць іх са снежнага палону.

Паводле апошніх звестак, пацверджана смерць чатырох чалавек, якія знаходзіліся ў гатэлі, на які сышла лавіна.

Пошукі цягнуцца два дні. Прапаўшымі без вестак уважаюцца прынамсі 25 чалавек.

Выратавальнікі ўручную разграблі тоны снегу і камянёў на месцы катастрофы. Дарогі, якія вядуць да месца, дзе знаходзіўся гатэль, па-ранейшаму блакаваныя глыбокім снегам. Улады прымаюць меры, каб расчысціць іх.