EPAM выйшаў з праграмы падрыхтоўкі айцішнікаў у ЕГУ

Чыннікі такой пастановы кампанія не назвала.

EPAM Sistemos нечакана заканчвае партнёрства з ЕГУ паводле праекту EPAM School of Digital Engineering (ESDE). Студэнтам прапануюць прадоўжыць навучанне ў ЕГУ на спецыяльнасці «Інфарматыка» ці перайсці ў іншыя ВНУ, піша Devby.io.

Паведамляецца, што студэнты даведаліся пра гэта 11 красавіка на сустрэчы з адміністрацыяй ЕГУ і дырэктарам літоўскага офіса EPAM. Прычыны такой пастановы кампанія не назвала са спасылкай на карпаратыўную таямніцу.

Кіраўніцтва ўніверсітэта прапанавала студэнтам прадоўжыць навучанне ў ЕГУ на спецыяльнасці «Інфарматыка» ў новай рэарганізаванай філіі – School of Digital Competences. Пры гэтым кіраўніцтва ЕГУ сцвярджае, што рэарганізацыя не закране навучальны працэс.

Альтэрнатыва – узяць акадэмічны адпачынак (у гэтым выпадку вернуць грошы за вясновы семестр) або перайсці ў іншы універсітэт пасля заканчэння семестра.

Адзін са студэнтаў ESDE даў каментар Devby.io. Паводле ягоных словаў, многія пакуль не ведаюць, што рабіць.

– Можна застацца ў ЕГУ, але незразумела, што будзе з праграмай, са структурай курсаў. Хоць і гавораць, што ўсё застанецца гэтак сама, верыцца ў гэта з цяжкасцю. Да таго ж выкладнікі былі часткова з EPAM. Пераходзіць у іншыя ўніверсітэты не выгадна праз рознасць праграмаў і коштаў навучання. У ЕГУ плата за навучанне за год складае да 2,5 тысячы еўраў, а ў іншых універсітэтах у Вільні, калі гаварыць пра тэхнічныя спецыяльнасці, блізу 4,2 тысячы еўраў за год.

EPAM School of Digital Engineering – эксперыментальнае падраздзяленне EPAM для падрыхтоўкі бакалаўраў і магістраў у партнёрстве з універсітэтамі. Праекты ESDE ўжо працуюць у ВНУ Польшчы, Узбекістана, Грузіі, Украіны і іншых краінаў. У 2022 годзе праграма адкрылася ў Літве ў партнёрстве з ЕГУ.

У праграме ў ЕГУ – тры спецыялізацыі на выбар, якія паглыблена вывучаюцца цягам чатырох семестраў:

Java EE;

.Net;

JavaScript/TypeScript.

Апроч спецыялізацыі ў праграму ўключаныя прадметы, якія дапамогуць будучым ІТ-адмыслоўцам развіваць soft skills і атрымліваць практычныя кампетэнцыі.

Навучанне вядзецца на расейскай мове з паступовым пераходам на ангельскую на старэйшых курсах. Першыя два семестры студэнты праходзяць інтэнсіў у ангельскай мове, а ў праграме навучання шырока выкарыстоўваюцца англамоўныя навучальныя матэрыялы.

Ёсць тры формы навучання: вочная (афлайн і анлайн) – 3,5 гады і завочная – 4,5 гады. Сёлета вочнае навучанне каштуе 1800 еўраў за семестр, завочнае – 1250 за семестр.