«Мужу казалі: пакармі сваю жонку»

Беларуска на марафоне за чатыры месяцы скінула 21 кілаграм.

У 34-гадовай вілейчанкі Кацярыны заўсёды была лішняя вага, і скінуць яе доўга не атрымлівалася. Да першых родаў яна важыла 115 кг, да другіх - 103. Праз пару гадоў дзякуючы дыеце і шпацырам атрымалася схуднець да 93, але далей лічбы на вагах спыніліся.

Нарэшце Кацярына надумала прайсці марафон пахудзення і за тры этапы за чатыры месяцы скінула 21 кг.

Яна расказала Kraj.by, як ёй гэта ўдалося.

Падчас праграмы пахудзення з Кацярынай і іншымі дзяўчатамі, якія жадаюць скінуць вагу, працавалі прафесійныя нутрыцыёлагі і псіхолагі, якія патлумачылі, што есці можна абсалютна ўсё: галоўнае — каб адсоткавая прапорцыя карысных рэчываў укладвалася ў дзённую норму калорый.

Кацярына праходзіла марафон тры разы. З першай жа спробы за 28 дзён яна скінула 7,7 кілаграма, потым 7,8 і, нарэшце, 6 кілаграм. Дзяўчына расказала, што разам з лішняй вагой сышлі і праблемы з суставамі, ногі больш не баляць, а на верхнія паверхі яна можа падымацца без дыхавіцы. Праўда, прызнаецца яна, людзі і зараз крытыкуюць яе новую знешнасць, а некаторыя нават падыходзілі да мужа і казалі: «Пакармі сваю жонку».

Цяпер Кацярына важыць 62 кг і трымае вагу пад кантролем. Два разы на тыдзень яна наведвае басейн, займаецца крокавымі трэніроўкамі пад відэа ў YouTube, штодня праходзіць мінімум 10 000 крокаў, а звычайны яе паказчык на крокамеры - ад 15 000 да 20 000 крокаў. Пры гэтым у ежы дзяўчына сябе не абмяжоўвае: можа з'есці сушы, цукеркі, торт, галоўнае - укласціся ў дзённую норму.