Колькі беларусаў змаглі атрымаць румынскі шэнген?

Распавялі ў консульстве.

З 1 красавіка Румынія пачала выдаваць шэнгенскія візы, стаўшы яшчэ адной краінай, з дапамогай якой беларусы могуць патрапіць у многія дзяржавы ЕЗ. Наколькі цяжка запісацца і падаць дакументы? Ці шмат беларусаў ужо атрымалі візы і на які тэрмін? «Зеркало» спытала аб гэтым у консульства Румыніі ў Беларусі.

Як расказалі ў консульстве Румыніі, беларусы сталі падаваць дакументы на шэнген з першага дня. На гэты момант ужо 20 чалавек атрымалі турыстычныя шэнгенскія візы. Адмоў з боку дыппрадстаўніцтва не было. У ведамстве таксама адзначылі, што выдаюць візы на перыяд, які запытваецца, але не даўжэй, чым на 180 дзён.

Таксама на гэты момант на падачу запісаныя яшчэ амаль 25 чалавек. Сам працэс, адзначылі ў ведамстве, займае 10-15 хвілін, калі заяўнік не мае праблем з дакументамі.

- У будучыні, улічваючы надыходзячы турыстычны сезон у Румыніі, колькасць запытаў на атрыманне віз можа павялічыцца, - разлічваюць у ведамстве. - Пры выкананні графіка [мы прымаем] прыкладна восем-дзесяць чалавек на дзень. Не будзем забывацца, што консульскі аддзел апрацоўвае і іншыя запыты: афармленне дакументаў грамадзянскага стану і натарыяльных дакументаў, выдачу пашпартоў, справы аб аднаўленні грамадзянства і гэтак далей.

Для атрымання турыстычнага румынскага шэнгена трэба зарэгістравацца на сайце МЗС Румыніі. Потым запоўніць анкету онлайн, загрузіць сканы пашпарта, квіткоў, рэзерваванне гатэля і страхоўкі, а таксама выпіскі з рахунку, дзе будзе неабходная для візіту сума (з разліку 50 еўра на дзень, але не менш як 500 еўраў за ўсё). Пасля гэтага ўжо можна далей абраць дату візіту ў консульства ў Менску.

У пасольства трэба прынесці арыгіналы і копіі дакументаў, загружаных на сайт, раздрукаваную анкету і фатаграфіі. Ужо ў консульстве трэба аплаціць візавы збор - для беларусаў ён складае 60 еўраў. Пасля падачы пастанову павінны прыняць за дзесяць каляндарных дзён (яе могуць прадоўжыць да 30 дзён, калі неабходны дадатковы разгляд).

Дакументы на афармленне віз у консульскім аддзеле прымаюць у панядзелак і сераду, з 09.30 да 12.00.