Беларускі рубель падае
12:04, — Эканоміка
Афіцыйны абменны курс беларускага рубля да даляра ЗША за студзень–верасень 2007 года знізіўся на 0,4% і на 1 кастрычніка склаў Br 2149 за 1 даляр, паведамілі БелТА ў Нацыянальным банку. За мінулы месяц ён скараціўся на 0,09%.
Курс беларускага рубля да расейскага за гэты перыяд скараціўся на 6,2% і на 1 кастрычніка склаў Br 86,13 за 1 расейскі рубель. Пры гэтым за верасень расейскі рубель да беларускага ўмацаваўся на 2,8%.
Афіцыйны абменны курс беларускага рубля да еўра за дзевяць папярэдніх месяцаў скараціўся на 8% і на 1 кастрычніка быў роўны Br 3044,27 за 1 еўра. У тым ліку за верасень ён знізіўся на 3,8%.
Як адзначылі ў Нацбанку, істотнае ўздзеянне на фактычную дынаміку афіцыйных курсаў беларускага рубля да замежных валют у студзені–верасні аказалі знешнеэканамічныя фактары, а таксама дынаміка курсаў вядучых валют на сусветных рынках.
Паводле асноўных кірункаў грашова-крэдытнай палітыкі Рэспублікі Беларусь у 2007 годзе, зыходзячы з сітуацыі на валютным рынку і стана знешняга гандлю, курс беларускага рубля да даляра ЗША будзе знаходзіцца ў калідоры значэнняў плюс/мінус 2,5%. У выніку афіцыйны абменны курс да даляра ЗША можа скласціся ў дыяпазоне Br 2090-2200 за 1 даляр ЗША. Пры гэтым з улікам прагназаваных узаемных змяненняў курсаў расейскага рубля і даляра ЗША калідор ваганняў намінальнага абменнага курсу да расейскага рубля ў гэтым годзе павінен складаць плюс/мінус 4%.
Як паведамлялася, Нацбанк адмовіўся ад правядзення ў 2008 годзе палітыкі прывязкі афіцыйнага курсу беларускага рубля да расейскага рубля. У галоўнай банкаўскай установе лічаць, што адначасовае выкарыстанне ў якасці прамежкавых мэтавых паказчыкаў курсу беларускага рубля да расейскага рубля і даляру ЗША ўскладняе правядзенне аператыўнай курсавой палітыкі.
