Еўрапейскі рух – за Беларусь
14:38, — Палітыка
Міжнародны Еўрапейскі рух вітае ініцыятыву беларускіх дэмакратычных сілаў па правядзенні 14 кастрычніка ў Менску Еўрапейскага Марша. «Марш стане праяўленнем волі грамадзян Беларусі наладзіць больш цесныя стасункі паміж Беларуссю і ЕЗ. Еўрапейскі рух запросіць сваіх сяброў прыехаць у гэты дзень у Менск», – гаворыцца ў заяве Руху.
«Мы адзначаем жаданне беларускіх улад палепшыць стасункі з ЕЗ. У той самы час мы занепакоеныя рэпрэсіямі супраць беларускіх грамадзян, якія бяруць удзел у падрыхтоўцы Еўрапейскага Марша. Нам вядомыя факты арыштаў людзей, якія выкарыстоўвалі сімволіку ЕЗ. Гэтыя факты выклікаюць трывогу, і сябры нашага Руху паінфармуюць пра іх кіраўніцтва ЕЗ і ўрады дзяржаў ЕЗ», – адзначае Еўрапейскі рух.
Еўрапейскі рух падтрымлівае еўрапейскія памкненні беларусаў. «Мы гатовыя падтрымліваць усе дзеянні, накіраваныя на тое, каб дапамагчы Беларусі прыняць дэмакратычныя еўрапейскія каштоўнасці і дасягнуць асабістай і эканамічнай свабоды і росквіту», – гаворыцца ў заяве.
Еўрапейскі рух з'яўляецца міжнароднай арганізацыяй. Яго мэта – спрыяць станаўленню аб'яднанай Еўропы, заснаванай на захаванні правоў чалавека, прынцыпах міру, дэмакратыі, свабоды і грамадзянскай салідарнасці. У рух уваходзяць нацыянальныя рады 41 дзяржавы і 21 асацыяваных арганізацый. Створаны больш як паўстагоддзя таму, Еўрапейскі рух сыграў вырашальную ролю ў будаўніцтве новай Еўропы.
