Украінцы прагаласавалі за эўрапейскую пэрспэктыву
2
15:35, — Палітыка
Паводле папярэдніх дадзеных, на парлямэнцкіх выбарах ва Ўкраіне перамагае блёк Юліі Цімашэнкі. "Добра, што Ўкраіна пайшла на датэрміновыя выбары. Зараз стаў зразумела вэктар, які абірае Ўкраіна, - пракаментаваў папярэднія вынікі парламенцкіх выбараў ва Украіне лідэр Партыі БНФ Вінцук Вячорка. - Зразумела, што пераважную большасьць галасоў украіны аддалі за эўрапейскую пэрспэктыву для сваёй краіны. Блёк Юліі Цімашэнкі і блёк "Наша Ўкраіна - Народная самаабарона" будуць мець усе магчымасьці для правядзеньня эўрапейскіх рэформаў на Ўкраіне. І я шчыра жадаю ім посьпеху".
На думку лідэра руху “За свабоду” Аляксандра Мілінкевіча, гэта сьведчыць пра дэмакратычныя і праэўрапейскія настроі ва Ўкраіне.
“І для Беларусі, безумоўна, гэта таксама важна, бо для нас эўрапейская арыентацыя, эўрапейскія каштоўнасьці многа значаць. І гэтая перамога, безумоўна, падтрымлівае беларускія дэмакратычныя сілы ў іх імкненьні да эўрапейскай цывілізацыі”.
Адзін зь лідэраў стваранай партыі “Беларуская хрысьціянская дэмакратыя” Павал Севярынец у інтэрв’ю “Радыё Свабода” заявіў, што вельмі ўсьцешаны тым, што ўкраінскі народ ужо трэці раз падтрымлівае дэмакратыю і ідэі, выказаныя на Майдане.
“Мне яны асабліва блізкія таму, што і Юлія Цімашэнка, і Віктар Юшчанка грунтуюцца на хрысьціянскіх, дэмакратычных каштоўнасьцях. У Юліі моцным завяршальным акцэнтам у кампаніі была ўвогуле малітва за Ўкраіну.
Я мару пра той час, калі беларускія дэмакратычныя сілы будуць здольныя да вось такіх моцных кампаніяў, як Майдан, як малітва за Беларусь. Мне здаецца, што прыход да ўлады Юліі Цімашэнкі ў якасьці прэм'ер-міністра — гэта безумоўнае дабро для дэмакратыі, для нацыянальнага і духоўнага абуджэньня ў Беларусі”, — лічыць Павал Севярынец.
