Незалежныя прафсаюзы патрабуюць адказу ад генпракурора
10:48, — Палітыка
Беларускі Кангрэс дэмакратычных прафсаюзаў (БКДП) звярнуўся да Генеральнага пракурора РБ Пятра Міклашэвіча з скаргай на бяздзейнасць пракуратуры Ленінскага раёна Менска.
Яшчэ 10 снежня БКДП накіраваў заяву пракурору Ленінскага раёна сталіцы Ігару Украінцу ў сувязі з пазапраўнымі дзеяннямі, якія адбыліся ў прафсаюзным офісе 6 снежня 2007 года. Да сёння пракуратура ніякіх дзеянняў па заяве БКДП не распачала. Пісьмовага адказу на свой запыт БКДП ад пракуратуры таксама не атрымаў. Хоць, паводле заканадаўства, адказ павінен быць дадзены цягам месяца, паведамляе сайт незалежнага прафцэнтра.
6 снежня, прыкладна а 20 гадзіне вечара, у офіс БКДП, размешчаны па вуліцы Якубава, уварвалася група асоб у цывільным і ў міліцэйскай форме. Гэтым часам там знаходзіліся маладыя людзі – актывісты прафсаюзнага руху. У офісе БКДП быў праведзены ператрус і выключаны рызограф. Акрамя таго, былі затрыманыя і дастаўленыя ў Ленінскае РУУС Менска два прафсаюзныя актывісты, адзін з якіх пасля быў асуджаны на 10 сутак арышту.
Навіны
па тэме
