«Дэпутаты» не жадаюць даваць дапамогу маладым маці – «могуць прапіць»

Матчын капітал дапаможа лепш стымуляваць нараджальнасць, чым павелічэнне памераў дапамогі на дзяцей, лічаць дэпутаты “палаты прадстаўнікоў”.

У прыватнасці, такое меркаванне ў гутарцы з карэспандэнтам БелТА выказаў старшыня Пастаяннай камісіі па ахове здароўя, фізічнай культуры, справам сям'і і моладзі “палаты прадстаўнікоў” “нацыянальнага сходу” Беларусі Алег Вялічка.

"Я прыхільнік такіх метадаў падтрымкі маладых сем'яў, як матчын капітал. Натуральна, што мы павінныя павялічваць і дапамогі сем'ям, якія выхоўваюць дзяцей. Але ёсць у гэтым і негатыўны момант. Павелічэнне дапаможнікаў можа падапхнуць да нараджэння дзяцей у асоб асацыяльных, якія будуць нараджаць дзяцей не для таго, каб іх потым годна выхоўваць, а з мэтай выдаткаваць грошы, напрыклад, на выпіўку, - сказаў суразмоўца. - Дапамога павінная забяспечваць пражытковы мінімум, але ісці толькі па шляху яго павелічэння няправільна. Нашмат лепш падаваць пры нараджэнні другога і наступнага дзіцяці матчын капітал. Гэты метад будзе больш стымуляваць сем'і заводзіць дзяцей, надасць упэўненасць у заўтрашнім дні".

Грошы матчынага капіталу можна будзе выдаткаваць, напрыклад, толькі на набыццё жылля, адукацыю дзяцей, удакладніў старшыня “парламенцкай” камісіі. Алег Вялічка таксама прапаноўвае дазволіць бескватэрным маладым сем'ям выкарыстаць грошы матчынага капіталу для наймання жылля.

Па меркаванні “парламентарыя”, на першым этапе Br10 млн. будзе аптымальнай сумай матчынага капіталу ў Беларусі. "Гэта не вельмі вялікія грошы, але нейкія праблемы за кошт іх могуць быць вырашаныя, напрыклад, навучанне, першы ўнёсак за жыллё, якое будуецца", - адзначыў Алег Вялічка.

"Натуральна, трэба будзе думаць аб павелічэнні сумы матчынага капіталу і цягнуцца за Расеяй, дзе пры нараджэнні другога або наступнага дзіцяці матчын капітал складае каля $10 тыс.", - дадаў ён.