Мінінформ папярэдзіў «Нашу Ніву» за артыкул пра свіны грып

Беларуская незалежная газета атрымала афіцыйнае тлумачэнне за папярэджанне, якое было вынесена Міністэрствам інфармацыі 18 лістапада.

Як паведамляе прэс-служба БАЖ, падставай для атрымання папярэджання стаў артыкул «Замоўчванне грыпу выклікае эпідэмію панікі», якая была надрукавана ў нумары 41 ад 4 лістапада.

У паведамленні Міністэрства інфармацыі за подпісам міністра Уладзіміра Русакевіча паведамляецца, што ў адпаведнасці з артыкулам 34 Закона Рэспублікі Беларусь «Аб сродках масавай інфармацыі» журналіст сродка масавай інфармацыі абавязаны праверыць сапраўднасць атрыманых ім дадзеных для распаўсюду дакладнай інфармацыі.

Як лічыць чыноўнік Міністэрства інфармацыі, статыстыка колькасці захварэлых і памерлых ад пнеўманіі ў Менску, што падаецца ў артыкуле, «не адпавядае рэчаіснасці». Пра гэта 12 лістапада Міністэрству інфармацыі паведаміла Міністэрства аховы здароўя.

Мінінфармацыі патрабуе ліквідаваць у дзесяцідзённы тэрмін парушэнне закона і паведаміць аб прынятых мерах чыноўнікам.

Варта адзначыць, што ў артыкуле «Нашай Нівы» сказана, што па стане на 30 кастрычніка ў краіне зафіксаваныя 39 смярцей, 9 з якіх у Менску ад пнеўманіі. Пры гэтым выданне спасылаецца на ўласную крыніцу ў адной з сталічных бальніц.

Нагадаем, што 18 лістапада Міністэрства інфармацыі Беларусі масава вынесла папярэджанні адразу чатыром незалежным газетам: «Народнай волі», «Нашай Ніве», «Комсомольской правде в Беларуси» і «Ва-банку».

Згодна з афіцыйнай інфармацыі Мінінформа, «Комсомольская правда в Беларуси» была таксама папярэджана за артыкул пра свіны грып, у якой паведамлялася, што ў Гомельскай абласной сухотнай бальніцы няма прэпарата «Таміфлю».