Студэнтам-платнікам могуць адмяніць адтэрміноўку ад службы ў войску

З такой ініцыятывай выступіў старшыня Сталай камісіі па адукацыі, культуры, навуцы і навукова-тэхнічным прагрэсе «палаты прадстаўнікоў» Уладзімір Здановіч.

Ён прапануе адмяніць адтэрміноўку ад прызыву для студэнтаў-платнікаў і навучэнцаў платных аддзяленняў.

У інтэрв'ю БелТА Уладзімір Здановіч адзначыў, што Мінабароны распрацавала законапраект, які прадугледжвае адмену адтэрміноўкі ад службы для студэнтаў ВНУ і сярэдніх спецыяльных навучальных устаноў завочнай формы навучання. Дакумент выклікаў у Авальнай Залі бурнае абмеркаванне. І на даволі частае пытанне аб прычынах выбару менавіта гэтай катэгорыі студэнтаў, а не, да прыкладу, «вячэрнікаў» або студэнтаў стацыянара, «дэпутаты» так і не атрымалі зразумелы адказ.

«Я лічу, што да гэтай праблемы варта падыходзіць па прынцыпе справядлівасці», - адзначыў суразмоўца. Па-першае, прызываць толькі тых, хто вучыцца завочна, не зусім правільна. Па-другое, гэта не вырашыць праблему, а праз год-два элементарна згарнуць прыём на завочную форму навучання, а на дзённую павялічаць.

«Трэба разважаць па-іншаму», - лічыць «дэпутат». Дзяржава, даводзячы ВНУ і ССНУ кантрольныя лічбы прыёму на бюджэтную форму навучання, тым самым фармуе замову на падрыхтоўку кадраў для галін народнай гаспадаркі, прычым як на вочнай, так і завочнай форме. Студэнты-бюджэтнікі, усё ж, пры паступленні паказваюць больш высокія вынікі, а па сканчэнні вучобы падлягаюць абавязковаму размеркаванню. «Таму прызываць на тэрміновую службу такіх студэнтаў, так, напэўна, і выпускнікоў, ні ў якім разе нельга», - падкрэсліў Уладзімір Здановіч.

Студэнты-платнікі ж атрымліваюць больш нізкія балы на тэсціраванні, размеркаванню яны не падлягаюць, ды і ў большасці выпадкаў па атрыманай спецыяльнасці не працуюць. Частка з іх лічацца студэнтамі фармальна, не праяўляюць ніякай цікаўнасці да будучай прафесіі. «Паступіў, каб у войска не ісці» - часта можна пачуць ад навучэнцаў і студэнтаў. У нядаўнім мінулым яны ставіліся да разраду «не дабраўшых балы» або «праваліўшыхся на іспыце» і, калі са здароўем было ўсё ў парадку, аўтаматычна траплялі пад прызыў. «Вось з гэтай катэгорыі можна фармаваць кантынгент салдат тэрміновай службы», - перакананы Уладзімір Здановіч.

Калі такая прапанова будзе ўхвалена, то ў навучэнцаў і студэнтаў абавязкова з'явіцца стымул да вучобы. Да таго ж жахі пра службу ў войску вельмі і вельмі перабольшаныя, часцей яны падаграюцца тымі, хто ў войску ўвогуле не служыў, адзначыў суразмоўца.

Уладзімір Здановіч таксама распавёў, што гэтая прапанова выклікала цікаўнасць у Міністэрстве абароны. У выпадку яе прыняцця адтэрміноўка на перыяд навучання будзе прадастаўляцца толькі тым навучэнцам і студэнтам, хто атрымлівае адукацыю за кошт сродкаў рэспубліканскага (мясцовага) бюджэту.

І яшчэ: прызваным на тэрміновую ваенную службу ў перыяд навучання пасля звальнення гарантуецца працяг навучання на ранейшых умовах там, дзе яны навучаліся да прызыву. То бок, паўторна паступаць і плаціць за вучобу не трэба. Яны таксама вызваленыя ад выплат па крэдытах на перыяд службы. «Ёсць прапанова на рахунак салдата штомесяц залічаць дзве базавыя велічыні, каб пасля выхаду на «гражданку» ён быў падтрыманы матэрыяльна хоць бы першы час», - дадаў суразмоўца.