Рашэнне з нагоды хвалі «Аўтарадыё» прынятае

Такую інфармацыю паведамілі ў Мінінфармацыі, а таксама пацвердзілі ў Мінсувязі. Але «Аўтарадыё» працягвае плаціць за частату, якой не карыстаецца.

Паўгады прайшло з таго часу, як спыніла вяшчанне «Аўтарадыё». Рашэнне, што будзе з частатой, на якой знаходзілася радыёстанцыя, ужо прынятае, але яго не агучваюць.

«Пры Міністэрстве інфармацыі ёсць камісія, якая разглядае гэтыя пытанні. У нас гэтае рашэнне ёсць, але мы яго не будзем каментаваць, таму што толькі камісія каментуе», - паведамілі ў міністэрстве «Еўрарадыё».

Старшыня камісіі, намеснік міністра інфармацыі Аляксандр Слабадчук, цяпер у адпачынку. Ва ўпраўленні электроннымі СМІ Мінінфармацыі кажуць, што «ў любым выпадку дадзеная інфармацыя толькі для службовага карыстання».

Тым часам «Аўтарадыё» працягвае плаціць за частату, якой не карыстаецца. За паўгады заплацілі каля 10 мільёнаў, - кажа дырэктар Юрый Базан:

«Нягледзячы на ​​тое, што мы не працуем на гэтай частаце, мы абавязаныя плаціць, паколькі гэтыя частоты для нас вылучаныя. Што будзе далей, шчыра кажучы, я не ведаю. Разлічваем хоць на нейкі здаровы сэнс»

- Вы чулі, што плануюць рабіць з гэтай частатой? Каму перададуць? Магчыма, будуць праводзіць тэндэр?

- Вы калі-небудзь чулі пра тэндэры на частату ў Менску? Я - не. Я не ведаю, што гэта за працэдура... Тут яшчэ асаблівасць у тым, што частата вылучаная непасрэдна і ўзгодненая па сумяшчальнасці ў тым ліку з Еўрапейскім саюзам электрасувязі. І яна прывязаная непасрэдна да кропкі выпраменьвання на Прытыцкага. Тэхнічна гэта даволі складана. Але ў нашай краіне ўсялякае, вядома, бывае.

Мінінфармацыі анулявала права на вяшчанне. Але як юрыдычная асоба Аўтарадыё працягвае існаваць. Таму і офіс з тэхнікай застаецца, тлумачыць Юрый Базан:

«Мы плацім за арэнду, за ўсё... Выконваем некаторыя замовы па гуку. Вядома, гэтага хапае толькі на тое, каб закрыць бягучыя выдаткі. Без эфіру. Вельмі цяжка, натуральна, асабліва ўлічваючы, што цяпер крызіс, і колькасць арганізацый ці людзей, якіх цікавіць апрацоўка гуку, рэзка зменшылася. Будзем неяк жыць, існаваць. Але хочацца ў эфір».

Аўтарадыё чакае адказу ад Міністэрства сувязі наконт далейшага лёсу радыёстанцыі. З адказу, які яны атрымалі нядаўна, нічога не зразумела...

«Паколькі сітуацыя неяк змяняецца, то я ўжо двойчы звяртаўся ў міністэрства, каб вырашыць гэтае пытанне ў несудовым парадку. Мы атрымалі адказ, з якога нічога не зразумела. Так што прыйшлося яшчэ раз звярнуцца напрыканцы мінулага тыдня», - кажа дырэктар.