Злотнікаў: Магчымы крах пенсійнай сістэмы

У сувязі з гэтым улады павялічаць узрост выхаду на пенсію, лічыць эканаміст.

«Пенсійны ўзрост сапраўды трэба павышаць, у Беларусі ён адзін з самых нізкіх у свеце. Праўда, беларусы і жывуць менш за іншых. Але павышаць узрост выхаду на пенсію трэба не з прычыны павышэння якасці жыцця, як заявіў намеснік міністра працы Валерый Кавалькоў, а ў сувязі з тым, што можа наступіць крах пенсійнай сістэмы», - сказаў у інтэрв'ю сайту charter97.org вядомы беларускі эканаміст Леанід Злотнікаў.

Па словах эксперта, хутка пенсійных адлічэнняў рабочых не будзе хапаць на выплату пенсій. «У нас адбываецца працэс, калі лік работнікаў зніжаецца, а колькасць пенсіянераў расце. Так будзе працягвацца 20-30 гадоў. І пенсійных адлічэнняў рабочых не будзе хапаць на выплату пенсій».

Ёсць тры спосабы не дапусціць краху пенсійнай сістэмы, адзначыў эканаміст. «Нешта трэба рабіць. Павялічваць працаздольны ўзрост. Альбо зніжаць пенсіі - а яны ў нас і так маленькія. Трэці варыянт - павялічваць адлічэнні ў пенсійны фонд. А гэтага рабіць таксама нельга, у нас адлічэнні ў яго вышэй, чым у Казахстане і Расеі. Гэтыя адлічэнні ўваходзяць у сабекошт прадукцыі. У тым ліку і дзякуючы гэтаму нашы тавары неканкурэнтназдольныя на рынку Адзінай эканамічнай прасторы (АЭП)»

Застаецца толькі павысіць пенсійны ўзрост, лічыць Леанід Злотнікаў. «Так што правільным рашэннем будзе павышэнне ўзросту выхаду на пенсію».

Нагадаем, нядаўна ў інтэрв'ю дзяржаўным СМІ намеснік міністра працы Валерый Кавалькоў заявіў, што ў Беларусі трэба павышаць узрост выхаду на пенсію. Ён абгрунтаваў гэта тым, што ў нашай краіне вырасла якасць жыцця і яе працягласць.