Міхалевіч: Лукашэнку выводзіць з сябе неадпаведнасць патрабаванням АБСЕ

Таму кіраўнік крытыкуе гэтую міжнародную арганізацыю, лічыць палітык.

«Я думаю, што Лукашэнка памыляецца. АБСЕ адыгрывае важную функцыю», - пракаментаваў сайту charter97.org сённяшнюю заяву Лукашэнкі кандыдат у прэзідэнты на выбарах 2010 года Алесь Міхалевіч.

Па словах палітыка, наша краіна не адпавядае нават патрабаванням Расеі як члена АБСЕ:

«АБСЕ - гэта арганізацыя, якая ўключае ў сябе як Расею, так і заходнія краіны. А тое, што Беларусь не адпавядае сярэднеўзважаным патрабаванням нават Расеі - гэта абсалютна зразумела. Думаю, гэта як раз-такі і выводзіць Лукашэнку з сябе больш за ўсё. Беларусь не адпавядае нават мінімальным патрабаванням у галіне праў чалавека».

Алесь Міхалевіч таксама патлумачыў, чаму кіраўнік крытыкуе назіральнікаў АБСЕ і хваліць назіральнікаў ад СНД:

«Назіральнікі АБСЕ з'яўляюцца больш-менш аб'ектыўнымі, у той час як назіральнікі СНД маюць адназначна палітычную пазіцыю ў падтрымку Лукашэнкі».

Нагадаем, 6 лістапада дыктатар заявіў журналістам, што не бачыць ніякай карысці ад дзейнасці АБСЕ.

«Праблема ў тым, што ў ёй былі зацікаўлены Захад і ЗША, калі ім супрацьстаяў магутны СССР. Сёння ім гэтая арганізацыя не патрэбна. А нам, з-за таго, што АБСЕ не выконвае сваіх функцый, таксама яна сто гадоў не патрэбна», - сказаў кіраўнік.