Жлобінскага «тэрарыста» прызналі шалёным

У судзе Жлобінскага раёна завяршыўся працэс па крымінальнай справе, узбуджанай яшчэ вясной па артыкуле «за тэрарызм».

Нагадаем, як сцвярджаюць у праваахоўных органах, апоўдні да мясцовага райаддзела міліцыі падышоў малады чалавек і кінуў бутэльку з запальнай сумессю. Пры сабе ў яго потым знайшлі і самаробнае выбуховае прыстасаванне магутнасцю каля 5 кілаграмаў у трацілавым эквіваленце. І што самае дзіўнае: сцвярджаецца, што хлопец з'явіўся да будынка міліцыі ў масцы з надпісамі на арабскай мове, піша «Комсомольская правда в Беларуси».

І вось суд вызваліў абвінавачанага ад крымінальнай адказнасці па прычыне шалёнасці! Заключэнне аб псіхічным захворванні было дадзена яшчэ падчас следства пасля некалькіх экспертыз, таму на суд, які праходзіў у закрытым рэжыме, абвінавачанага нават не дастаўлялі.

- Ён не ўсведамляў значэння сваіх дзеянняў і не мог кіраваць імі. У той жа час, было апытана каля 60 сведак і ўстаноўлена, што інкрымінаваныя дзеянні малады чалавек сапраўды здзяйсняў. Ён прызнаўся, што рабіў усё па сваёй асабістай ініцыятыве, ім ніхто не кіраваў. У вызначэнні суда сказана прызначыць прымусовыя меры бяспекі і лячэння ў псіхіятрычным стацыянары са строгім назіраннем. Тэрмін лячэння павінны вызначыць урачы. Малады чалавек прадстаўляе небяспеку для грамадства і да ўступлення пастановы суда ў законную сілу знаходзіцца ў СІЗА, - распавялі ў судзе.

А адразу пасля затрымання тэрарыста КДБ называў версію яго матываў: хлопец быў звязаны з арганізаванай злачыннай групай па перапраўцы афганцаў у Еўразвяз. І помсціў міліцыянтам за перакрыцце канала нелегальнай міграцыі. Нядаўна Камітэт дзяржбяспекі рабіў новую заяву: у асобную вытворчасць выдзелены матэрыял аб сувязях абвінавачанага праз інтэрнэт са злачыннай групай па перапраўцы афганцаў у Еўропу.