Пуцін раскрыў дзяржаўную таямніцу Менска

На ўчорашняй прэс-канферэнцыі Уладзімір Пуцін раскрыў дзяржаўную таямніцу аб сустрэчы ў Менску расейскіх апазіцыянераў з грузінскімі палітыкамі.

На сустрэчы нібыта абмяркоўваліся планы па арганізацыі масавых беспарадкаў, тэрактаў і захопу ўлады ў асобных рэгіёнах Расеі.

Нагадаем, у цяперашні час Следчы камітэт РФ расследуе крымінальную справу ў дачыненні да каардынатара радыкальнага руху «Левы фронт» Сяргея Удальцова, яго памочнікаў Леаніда Развазжаева, Канстанціна Лебедзева і іншых асоб аб падрыхтоўцы да арганізацыі масавых беспарадкаў. Па версіі следства, на грошы грузінскага палітыка Гіві (Георгій Васільевіч) Таргамадзэ яны планавалі ўчынііць «масавыя беспарадкі, якія суправаджаюцца гвалтам, пагромамі і падпаламі з ужываннем агнястрэльнай зброі і выбуховых рэчываў на тэрыторыі Масквы, Калінінграда, Уладзівастока і іншых гарадоў».

Прэзідэнт Расеі Уладзімір Пуцін на прэс-канферэнцыі назваў Таргамадзэ чалавекам, які «спрабаваў, і, можа быць, да гэтага часу гэта робіць, падбухторваць грамадзян Расейскай Федэрацыі да здзяйснення супрацьпраўных дзеянняў, якія маглі выяўляцца ў здзяйсненні тэрарыстычных актаў, да незаконнага захопу ўлады», пішуць «Белорусские новости».

Нагадаем, што Таргамадзэ і Удальцоў з кампаніяй былі галоўнымі дзеючымі асобамі фільма канала НТВ «Анатомія пратэсту-2», паказанага ў кастрычніку. У аснову фільма ляглі фрагменты відэазапісу схаванай камерай сустрэчы змоўшчыкаў, якая, па дадзеных следства, «праходзіла ў чэрвені 2012 года ў Менску ў жылым памяшканні». Менавіта на падставе гэтых відэаматэрыялаў была ўзбуджаная крымінальная справа. Следства прызнала іх сапраўднымі - эксперты не выявілі ў іх прыкмет мантажу.

Выступаючы перад журналістамі ў прамым эфіры, Пуцін назваў здымку ў Менску «пераканаўчай» і распавёў, як змоўшчыкі патрапілі ў аб'ектыў схаванай камеры.

«Яны выпадкова, павінен вам раскрыць дзяржаўную тайну, патрапілі пад здымку ў кантраляваным памяшканні, - заявіў расейскі прэзідэнт і дадаў: - Гэта аб'ектыўныя дадзеныя. Супраць гэтага не папрэш. Ён (Таргамадзэ) іх інструктаваў з нагоды таго, як здзейсніць злачынства ў Расейскай Федэрацыі».

Варта заўважыць, што згаданыя былым супрацоўнікам КДБ СССР Пуціным словы «кантраляванае памяшканне» з'яўляецца тэрмінам са слоўніка супрацоўнікаў праваахоўных органаў, якія займаюцца правядзеннем аператыўна-вышуковых мерапрыемстваў (АВМ). У дадзеным выпадку ён азначае, што ў памяшканні адмыслова была ўсталяваная апаратура з арсенала спецслужбаў: схаваныя камеры, так званыя «жучкі» і іншае. Такія аперацыі праводзяцца таемна, афішаванню не падлягаюць, але ёсць істотны момант. Для правядзення такіх АВМ патрабуюцца абумоўленыя законам сур'ёзныя падставы і адпаведная санкцыя. У Беларусі пастановы на «падглядванне» і «праслушку» могуць выдаваць пракуратура і першыя асобы КДБ, МУС і яшчэ пяці службаў. Хто кантраляваў «жылое памяшканне» ў Менску, дзе расейскія апазіцыянеры і іх грузінскія сябры распрацоўвалі падступныя планы, невядома. Гэтую таямніцу Пуцін вырашыў не выдаваць.

«Кантраляваныя памяшканні» дзеляцца на некалькі відаў. Яны могуць быць, так бы мовіць, часовымі ці разавымі. Напрыклад, калі ідзе распрацоўка падазраванай у злачынстве асобы і ў месцах яе пражывання таемна ўстанаўлiваюцца адпаведныя закладкі. Пасля аперацыі абсталяванне адбіраецца. Здабытая законным шляхам інфармацыя прызнаецца ў судзе доказам.

Існуюць яшчэ і доўгатэрміновыя «кантраляваныя памяшканні». Але яны абсталёўваюцца відавочна незаконна і адносяцца да разраду асабліва ахоўных сакрэтаў. Можна толькі здагадвацца пра іх магчымы пералік, у якім знойдзецца месца дыпламатычным прадстаўніцтвам, офісам палітычных партый і грамадскіх арганізацый. Не выключана, што ў якасці стацыянарных «кантраляваных памяшканняў» могуць выкарыстоўвацца нумары гасцініц.

Па здымках ў Менску цяжка выказаць здагадку, што ўяўляе сабой памяшканне, дзе збіраліся змоўшчыкі. У аб'ектыў камеры з даволі слабым дазволам, але абсталяванай зумам, патрапіла толькі частка пакоя, якая можа быць часткай офіснага памяшкання, загараднага дома ці нумара гасцініцы.

У чым няма сумненняў, дык гэта ў тым, што ў такія «кантраляваныя памяшканні» выпадкова, як абмовіўся Пуцін, не трапляюць. Няма сумненняў і ў тым, што здымка вялася незаконна. У адваротным выпадку яе не прыйшлося б легалізаваць праз фільм канала НТВ, супрацоўнікі якога сцвярджаюць, што запіс ім быў перададзены ў Маскве «невядомай асобай грузінскай нацыянальнасці».

Характэрна, што Гіві Таргамадзэ, абвінавачаны шэсць гадоў назад беларускім КДБ у падрыхтоўцы тэрактаў, цяпер называе сябе сябрам былога кіраўніка ведамства Сцяпана Сухарэнкі, у інтэрв'ю «Новой газете» распавёў, што часта прыязджае ў Беларусь. Некалі Таргамадзэ актыўна дапамагаў радыкальным беларускім апазіцыянерам, а затым знайшоў спосаб «дамовіцца» з беларускімі ўладамі...

Ды і Сяргей Удальцоў на допыце ў Следчым камітэце, частка якога была апублікаваная, распавёў, што сапраўды быў у Менску разам з Развазжаевым і Лебедзевым у чэрвені. Прычым, па яго словах, яны ездзілі сустракацца з «мясцовымі бізнесменамі - знаёмымі Лебедзева». Абмяркоўвалі пытанне фінансавання апазіцыі. На сустрэчы, адзначаў Удальцоў, прысутнічалі людзі розных нацыянальнасцяў, у тым ліку малдаване і грузіны. Са словаў Удальцова вынікае, што яму вядомы нейкі Георгій Васільевіч, які, на яго думку, з'яўляецца грузінам.

Як раней паведамлялася, следства па справе «менскіх» змоўшчыкаў заявіла пра гатоўнасць накіраваць у Грузію запыт аб прававой дапамозе. Ці мае намер Следчы камітэт з такім жа запытам звярнуцца (ці ўжо звярнуўся) да беларускага боку? Асабліва з улікам таго, што Пуцін ужо «раскрыў дзяржаўную тайну». Гэтае пытанне карэспандэнта інтэрнэт-газеты Naviny.by ва Упраўленні ўзаемадзеяння са СМІ СК РФ пакінулі без адказу. «Можаце выкарыстоўваць любую інфармацыю, якая публікуецца на нашым сайце па гэтай справе», - толькі і сказалі журналісту ў прыёмнай начальніка ўпраўлення.

Следства працягваецца. Магчыма, супрацоўніцтва праваахоўнікаў дзвюх краін не мае патрэбу ў афіцыйных запытах. А ўсё, што адбываецца вакол сталіцы Беларусі як цэнтра змовы, - гэта свайго роду аператыўная камбінацыя. З боку Крамля мэта яе ясная: заглушыць пратэстныя настроі электарату. Роля афіцыйнага Менска пакуль невідавочная. Пачакаем да наступнага раскрыцця дзяржтаямніцы...