Відэа катастрофы самалёта ва Внукаве

Кадры катастрофы самалёта Ту-204 у аэрапорце Внукава зафіксаваў відэарэгістратар аўтамабіля, які праязджаў па Кіеўскай шашы.

Нагадаем, пасля жорсткай пасадкі лайнер авіякампаніі Red Wings выкаціўся за межы ўзлётна-пасадачнай палосы і, са слоў відавочцаў, даслоўна пратараніў загараджальную сетку. Абломкі самалёта разляталіся ва ўсе бакі і траплялі ў самаходы, што ехалі міма, паведамляюць РИА "Новости".

У выніку здарэння загінулі чатыры чалавекі. Чацвёра пацярпелых былі дастаўленыя ў шпіталі. Іх стан не змяніўся, паведаміў у нядзелю прадстаўнік Міністэрства аховы здароўя РФ.

«Стан мужчыны 32 гадоў, які дастаўлены ў Першы Градскі шпіталь, па-ранейшаму ацэньваецца як вельмі цяжкі, а астатніх - як цяжкі», - сказаў суразмоўца агенцтва.

Паводле ягоных слоў, на сённяшні дзень праводзяцца кансультацыі лекараў розных спецыяльнасцяў з федэральных устаноў ЦНДІ траўматалогіі і артапедыі імя Прыорава і НДІ нэйрахірургіі імя Бурдэнкі. З мэтай псіхалагічна-псіхіятрычнай дапамогі сваякам пацярпелых у лякарні накіраваныя спецыялісты ДНЦ сацыяльнай і судовай псіхіятрыі імя Сербскага, паведамілі ў Міністэрстве аховы здароўя.

Апазнанне загінулых пры жорсткай пасадцы самалёта ТУ-204 і правядзенне судмедэкспэртызы адбудзецца ў нядзелю, паведамляе прэс-служба Міністэрства аховы здароўя Расеі.

«Апазнанне і правядзенне судова-медыцынскай экспэртызы запланаванае на 30 снежня ў Бюро судова-медыцынскай экспэртызы дэпартамента аховы здароўя Масквы. Сфармаваныя брыгады судмедэкспэртаў», - гаворыцца ў паведамленні.

Самалёт Ту-204, што належаў Red Wings, у суботу выкаціўся за ўзлётную палосу ў маскоўскім аэрапорце «Внукава» і загарэўся. Для расследавання прычын аварыі створана камісія МАК з удзелам Расавіяцыі і Растранснагляду. Папярэдняя прычына надзвычайнага здарэння - памылка пілотаў, распачатая крымінальная справа.