Аляксандр Ярашук: Мала хто ў свеце рызыкаваў выкарыстоўваць прымусовую працу

Старшыня Беларускага кангрэсу дэмакратычных прафзвязаў раскрытыкаваў адыёзны дэкрэт аб «прыгоне».

Аляксандр Ярашук распавёў udf.by, што БКДП ужо данёс інфармацыю аб тым, што ў нашай краіне заканадаўча ўведзенае выкарыстанне прымусовай працы.

«Шмат хто меркаваў, ва ўлады стане розуму спыніцца ля ўскрайку, ля мяжы, за якой пачынаецца поўная непрадказальнасць наступстваў. Не выстарчыла розуму, таму і з'явіўся гэты адыёзны дэкрэт, - сказаў Аляксандр Ярашук. - Я ўжо казаў, што беларускі кіраўнік - вялікі прыхільнік трацкізму, на фоне якога Сталін выглядае гэтакім лібералам. Але Беларусь - досыць еўрапейская краіна, часы ўжо не тыя, таму пабудаваць тут Паўночную Карэю ці М'янму наўрад магчыма. Бо ў М'янме таксама выкарыстоўвалі прымусовую працу: прыкоўвалі рабочых ланцугамі да іх працоўных месцах.

Мы жывем ужо ў іншай краіне, чым тая, якая была да падпісання гэтага дэкрэта. Пры ўсёй разнастайнасці палітычных сістэм у свеце мала хто браў на сябе рызыку - выкарыстоўваць прымусовую працу.

Гэта выклік міжнароднай супольнасці. На месцы дрэваапрацоўчай галіны, пра якую ідзе гаворка ў дэкрэце № 9, можа апынуцца ўсялякае прадпрыемства, усялякая галіна, ва ўсякім рэгіёне. Таму рэакцыя міжнароднай супольнасці будзе адназначнай. Гэты дэкрэт парушае не толькі Канстытуцыю, якая гарантуе права на занятасць, на свабоду выбару працоўнага месца. Гэты дэкрэт парушае Канвенцыю МАП № 105 аб забароне прымусовай працы, якую ратыфікавала Рэспубліка Беларусь, Канвенцыю МАП № 122 - аб занятасці.

Мы ўжо паінфармавалі МАП аб намерах беларускага кіраўніка ўвесці нормы прымусовай працы ў краіне. Дэкрэт № 9 ўводзіць у Беларусі прымусовую працу.

Гэты акт мае яшчэ адно вельмі небяспечнае наступства з непрадказальным вынікам. Улада паказала, пад якую глыбокую дэградацыю ў краіне падпала права», - сказаў Аляксандр Ярашук.

Лідэр БКДП не стаў прадказваць рэакцыю рабочых на дэкрэт правадыра.

«Я не бяруся прагназаваць, што заўтра-паслязаўтра, праз месяц, год, з падпісаннем падобных дакументаў, якія занураюць нас з галавой у змрочнае сярэднявечча, пачнуцца выступы рабочых. Яны могуць пачацца і заўтра-паслязаўтра, такія рэчы непрадказальныя.

Але няўхільна фармуецца тэндэнцыя нарастання сацыяльнай напружанасці: выступы працоўных у гэтым годзе на шэрагу прадпрыемствах паказалі іхную незадаволенасць узроўнем заробку. А гэты дэкрэт робіць працоўных цалкам бяспраўнымі. Гэта ў даслоўным сэнсе вяртанне да прыгону.

Але баюся, гэтым усё не скончыцца. Чым даўжэй цяперашні рэжым знаходзіцца ва ўладзе, тым больш ён спараджае «нядбайлаў», «дармаедаў», чым і матывуецца ўвядзенне жорсткіх захадаў.

Самы вялікі вораг беларускага рэжыму - сам беларускі рэжым. Калі яшчэ пару гадоў цяплілася надзея на нейкую эканамічную лібералізацыю, ці палітычнае пацяпленне, то цяпер можна з поўнай упэўненасцю казаць - гэтага не будзе. Улада перайшла да чаканага закручвання гаек. Пажадаем ёй паспяхова выкапаць сабе магілу. Гэтыя вясёлыя цікавыя часы, якія нас чакаюць наперадзе, доўга не здоўжацца: вечна агонію працягваць нельга», - сказаў ён.

Нагадаем, 7 снежня Аляксандр Лукашэнка падпісаў дэкрэт, у адпаведнасці з якім работнікаў гэтых прадпрыемстваў пераводзяць на кантрактную форму найму, а датэрміновае скасаванне кантрактаў магчыма толькі са згоды наймальніка.