«Палатачнік» Гумінскі: Патрэбны закон супраць дармаедства

Намеснік старшыні «палаткі» Віктар Гумінскі выступае за распрацоўку законапраекта аб барацьбе з дармаедствам.

Такую ідэю ён выказаў сёння на паседжанні Менаблвыканкама, на якім разглядалася рэалізацыя патрабаванняў Дырэктывы № 1, перадае карэспандэнт БелТА.

На думку Віктара Гумінскага, прыняцце падобнага закона спрыяла б умацаванню грамадскай бяспекі і дысцыпліны.

Дадзеная прапанова выклікала дыскусію сярод іншых удзельнікаў паседжання Менаблвыканкама. Дзяржсакратар Савета Бяспекі Леанід Мальцаў ў цэлым падтрымаў ідэю аб неабходнасці ўключыць людзей у грамадска карысную дзейнасць, заняць іх, але гэта, па ягоных словах, трэба ажыццяўляць не праз закон аб дармаедстве, а задзейнічаць іншыя рычагі, механізмы, у тым ліку прававога характару.

«Прыняцце дадатковых мер, якія садзейнічаюць рэалізацыі патрабаванняў Дырэктывы № 1, вядома, патрэбнае. Толькі прафілактычныя брашуры, лозунгі эфекту не прынясуць. І ў першую чаргу трэба звярнуць увагу на п'янства на працоўным месцы. У стане алкагольнага ап'янення знаходзіўся практычна кожны чацвёрты загінулы на вытворчасці», - адзначыў Леанід Мальцаў.

Старшыня Менаблвыканкама Барыс Батура таксама лічыць немэтазгодным распрацоўку такога нарматыўна-прававога акта. У рэспубліцы дзейнічае дэкрэт № 18 «Аб дадатковых мерах па дзяржаўнай абароне дзяцей у недабрабытных сем'ях», рэалізацыя якога дазваляе на ранніх стадыях выяўляць сямейны недабрабыт і дапамагчы бацькам стаць на шлях выпраўлення. Гэта своеасаблівая барацьба з дармаедствам ў дачыненні да тых, у каго ёсць дзеці і хто не хоча за імі глядзець. Астатняе ж - п'янства, разгільдзяйства на працоўным месцы - вынік бяздзейнасці адказных служб. У многіх арганізацыях гэтых праблем няма, паколькі прынятыя дзейсныя меры па іх недапушчэнні.