Калінін: Беларусь і Расея дамовіліся па авіяперавозках
23- 9.04.2012, 17:36
Менск і Масква дамовіліся аб авіяперавозках на летні перыяд.
Пра гэта намеснік прэм'ер-міністра Беларусі Анатоль Калінін заявіў 9 красавіка на перамовах з намеснікам міністра транспарту РФ Валерам Акулавым, перадае «Тэлеграф».
Разам з тым, адзначыў беларускі віцэ-прэм'ер, «хацелася б, каб мы дамаўляліся адразу на пяцігодку, а не на летні або зімовы перыяд».
Па словах намесніка кіраўніка ўрада, Беларусь прапанавала Расеі стварыць адзіныя ўмовы для выканання пасажырскіх і грузавых авіяперавозак, «у тым ліку выкарыстоўваючы выгаднае транзітнае размяшчэнне нашых краін». «Галоўнае тут - кансалідаваць нашыя намаганні», - падкрэсліў Анатоль Калінін.
«Тыя рознагалоссі, што былі, не робяць нам гонару ў адносінах да пасажыраў. Спрэчка, якая паўстала паміж авіяперавозчыкамі, паўстала на роўным месцы», - канстатаваў віцэ-прэм'ер і адзначыў, што ў пагоні за эканамічным эфектам авіяперавозчыкі дзвюх краін не павінныя забывацца на неабходнасць забеспячэння бяспекі перавозак.
Нагадаем, генеральны дырэктар кампаніі «Белавія» Анатоль Гусараў заявіў 7 красавіка, што ў канфлікце паміж авіяцыйнымі ўладамі Беларусі і Расеі бакі кіруюцца выключна інтарэсамі бізнесу.
«Белавія» ужо заявіла пра намер аспрэчыць у Гаспадарчым судзе АЭП рашэнне расейскіх авіяцыйных уладаў аб забароне на рэйсы «Белавія» ў рэгіёны Расеі з 13 красавіка і працягнуць выкананне рэйсаў.