Мальцаў шантажуе Еўропу мяжой

Беларусь прапануе Еўразвязу прыняць далейшыя меры па ўзмацненні сумеснай аховы мяжы.

Аб гэтым Аляксандру Лукашэнку 11 мая далажыў дзяржаўны сакратар Савета бяспекі Леанід Мальцаў.

Закранаючы пытанні памежнай бяспекі, дзяржсакратар адзначыў, што асноўная ўвага надаецца забеспячэнню нацыянальных інтарэсаў Беларусі.

«Пры гэтым мы ў тым ліку абараняем інтарэсы той жа Польшчы, Літвы, усяго Еўразвяза. Мы блакуем пранікненне да іх наркотыкаў, нелегальных мігрантаў, зброі. Таму тут неабходна і гэтым краінам, і Еўразвязу ў цэлым, паглядзець і для абароны сваіх інтарэсаў прыняць адпаведныя меры. Давайце дамаўляцца, што трэба яшчэ зрабіць, а не ўводзіць нейкія там санкцыі і пагаршаць становішча», - адзначыў Леанід Мальцаў.

У цэлым, як далажыў дзяржсакратар Савета бяспекі, сістэма нацыянальнай бяспекі працуе ў штатным рэжыме. «Пагрозы нацыянальнай бяспецы ў цяперашні час няма», - сказаў ён.