Чарнагорыя пачала перамовы аб уступленні ў Еўразвяз
8- 30.06.2012, 10:51
Рашэнне аб пачатку перамоваў з Чарнагорыяй было прынятае на саміце Еўразвяза ў Бруселі, які праходзіў 28-29 чэрвеня.
Чарнагорыя фармальна пачала перамовы аб уступленні ў Еўразвяз, перадае Reuters. «Чарнагорыя ўжо шмат чаго дамаглася. Але трэба зрабіць яшчэ болей. Неабходна будзе дамагчыся лепшых вынікаў адразу ў некалькіх абласцях на наступным этапе, перш за ўсё, у забеспячэнні асноўных правоў і свабод, а таксама ў судовай сферы», - сказаў еўракамісар па пашырэнні Штэфан Фюле.
Чарнагорыі таксама неабходна больш увагі надаваць барацьбе з арганізаванай злачыннасцю і карупцыяй, адзначыў чыноўнік.
Эксперты адзначаюць, што перамовы аб уступленні ў ЕЗ могуць зацягнуцца на некалькі гадоў.
У Чарнагорыі пражываюць каля 680 тыс. жыхароў. Асновай эканомікі з'яўляецца турызм і жыллёвае будаўніцтва. Сярод дзяржаў, што раней былі часткай Югаславіі, у ЕЗ уваходзіць толькі Славенія. Харватыя павінная далучыцца да Еўразвяза ў ліпені 2013 года.
Нагадаем, што Чарнагорыя аддзялілася ад Сербіі ў 2006 годзе.