Беларусь не растаецца з марай збіраць кітайскія легкавушкі

У Беларусі рацыянальна пабудаваць завод пад ключ па вытворчасці легкавых аўтамабіляў кітайскай маркі.

Пра гэта 17 жніўня на прэс-канферэнцыі заявіў генеральны дырэктар Аб'яднанага інстытута машынабудавання Нацыянальнай акадэміі навук Андрэй Дзюжаў, піша БелаПАН.

«Што датычыцца вытворчасці легкавых аўтамабіляў, то традыцыйна лічылася, што Беларусь не будзе ў гэтым удзельнічаць. Справа ў тым, што ствараць вытворчасць поўнага цыкла неабходна пад вялікія аб'ёмы», - адзначыў Дзюжаў.

«І сёння завод поўнага цыкла - гэта дарагое мерапрыемства. І калі гэтым займацца, то пачынаць трэба з супрацоўніцтва з нейкім аўтамабільным брэндам, які прапануе эфектыўную мадэль для сённяшняй ёмістасці рынку», - адзначыў гендырэктар інстытута.

Ён прывёў прыклад Расеі, якая ўпусціла на рынак шмат аўтамабільных брэндаў. Пры ёмістасці рынку ў 2 млн. аўтамабіляў у год створаны магутнасці на 3 млн. «Сёння, каб быць на рынку Расеі, неабходна расштурхваць локцямі канкурэнтаў», - сказаў Дзюжаў.

«Нам неабходна правільна вызначыцца з тым сегментам рынка, на якім будуць запатрабаваныя аўтамабілі. І з гэтага будзе зыходзіць, які брэнд, якая фірма будзе лепшай для нас у якасці партнёра па будаўніцтву завода «пад ключ». Вядома, будзе патрэбна і лакалізацыя вытворчасці» , - лічыць спецыяліст.

Пры гэтым ён адзначыў, што не можа каментаваць, які сегмент рынку найбольш перспектыўны для Беларусі: «Магчыма, гэта будзе машына за 8-9 тыс. даляраў. Мабыць, гэта ўсё ж такі можа быць эфектыўнае партнёрства з адным з кітайскіх вытворцаў».

Пры гэтым гендырэктар інстытута адзначыў, што ў кітайскіх і карэйскіх вытворцаў былі праблемы з пасіўнай бяспекай, якія сёння ў сваёй большасці вырашаны. «Чаму яны пакуль не навучыліся? Ёсць спецыялісты і ў нас, і ў Кітаі. Працэс набліжаецца да таго, што можна нівеліраваць адставанне ад агульнаеўрапейскіх дасягненняў», - лічыць Дзюжаў.

Як паведамлялася раней, у Беларусі пачата вытворчасць легкавых аўтамабіляў сумесна з кітайскай кампаніяй Geely. У рамках праекта першыя два аўтамабіля ўжо сабраны і зараз праходзяць сертыфікацыю. На першым этапе будзе ажыццяўляцца адвёрткавая зборка на плошчах Барысаўскага завода аўтатрактарнага электраабсталявання. Затым поўнамаштабная вытворчасць з высокай ступенню лакалізацыі будзе разгорнута ў беларуска-кітайскім індустрыяльным парку ў Менскай вобласці.

Дарэчы, кітайскі седан бізнэс-класа Brilliance BS6 апынуўся аўтамабілем-забойцам.