Беларускі рэжым актыўна ўзбройваўся напярэдадні прэзідэнцкіх выбараў

У 2010 годзе на закупку лёгкага ўзбраення і амуніцыі было выдаткавана каля $1,5 млн.

Гэта самая буйная пакупка за ўвесь час незалежнасці краіны. Беларусам новыя дубінкі і экіпіроўка спецназа запомняцца надоўга.

Асноўнымі пастаўшчыкамі ўзбраення сталі Германія, Аўстрыя, Польшча, Чэхія, Італія і Турцыя. Для параўнання, у 2009 годзе Беларусь закупіла аналагічнага ўзбраення на $558 тысяч, у 2008 - на $646 тысяч, у 2007 - на $708 тысяч.

Такія дадзеныя прадстаўлены ў інтэрактыўнай схеме сусветнага гандлю лёгкай зброяй і амуніцыяй ад кампаніі Google. Схема стваралася пры ўдзеле Igarape Institute.

Ініцыятыва Google з'яўляецца часткай праекта, у рамках якога кампанія паспрабуе ўнесці свой уклад у барацьбу з наркагандлярамі, гандлярамі людзьмі і зброяй.

Распрацаваная на аснове розных дадзеных схема дазволіць вызначаць асноўныя напрамкі гандлю зброяй. У прыватнасці, Google атрымалася займець каля 1 млн дадзеных аб імпарце і экспарце стралковай зброі, лёгкай зброі і боепрыпасаў за перыяд з 1992 года па 2010 год. Гандаль ажыццяўляўся 250 дзяржавамі. Усе дадзеныя былі прадастаўлены Міжнародным інстытутам даследаванняў праблем свету ў Осла (PRIO).

Нагадаем, толькі ў чэрвені 2011 года ЕЗ увёў эмбарга на пастаўкі ў Беларусь узбраення і амуніцыі, якія могуць быць ужытыя для ўнутраных рэпрэсій. Сярод іх - аўтазакі, вадамёты, абсталяванне для начнога бачання, амуніцыя, уключаючы шлемы і шчыты. Забароненыя для продажу ваенныя і баявыя нажы і штыкі з лязом даўжэй 10 см.

Схема сусветнага гандлю зброяй размешчана тут.