Расея абмяжуе пастаўкі нафты ў Беларусь
118- 13.09.2012, 12:37
Вырабляць бензін для кантрабанды не будзе з чаго.
Таксама расейскія ведамствы прынялі рашэнне пра ўраўнаванне экспартных пошлін на бензін і растваральнікі.
Пра гэта паведаміў Агенцтву нафтавай інфармацыі намеснік міністра энергетыкі РФ Анатоль Яноўскі, перадае «Інтэрфакс».
«Рашэнне прынята, ёсць адпаведнае даручэнне віцэ-прэм'ера Дварковіча і гэтае пытанне будзе хутка выносіцца на разгляд ЕЭК», - сказаў ён.
Міністэрствы і ведамствы РФ вывучаюць магчымасць павышэння экспартных пошлін на растваральнікі да ўзроўню экспартных пошлін на бензін у рамках Мытнага Саюза.
Расейскі бок лічыць, што Беларусь, у апошні час павялічыўшы закупкі расейскай нафты, стала экспартаваць на еўрапейскія рынкі бензін пад выглядам растваральнікаў. Экспартная пошліна на растваральнікі ў рамках Мытнага саюза роўная нулю, тады як на бензін складае 90% ад экспартнай пошліны на нафту. Падобная схема прыводзіць да істотных страт расейскага бюджэту, якія толькі ў 2012 годзе могуць дасягнуць $2 млрд.
Ведамствы адначасова вывучаюць пытанне аб магчымасці ўвядзення абмежаванняў паставак расейскай нафты на тэрыторыю Беларусі ў рамках аб'ёмаў, зацверджаных энергабалансамі дзвюх краін.