ЗША ўвядуць санкцыі супраць яшчэ аднаго сябра Лукашэнкі

Галоўнага расейскага камуніста Генадзя Зюганава пакараюць за абразлівыя словы ў адрас загінулага амерыканскага дыпламата.

Злучаныя Штаты абурыў запіс у твітары лідэра КПРФ, піша lenta.ru. Са зместам запіса ў мікраблогу Генадзя Зюганава, ужо азнаёміліся і ў Дзярждэпартаменце ЗША, і ў адміністрацыі амерыканскага прэзідэнта.

14 верасня, праз два дні пасля гібелі амбасадара ЗША ў Лівіі Крыстафера Стывенса, у мікраблогу Зюганава быў размешчаны запіс - «Амерыканскага амбасадара ў Лівіі расстралялі, як апошняга сабаку. Гэта быў галоўны спецыяліст па лівійскай «рэвалюцыі». Ён атрымаў тое, што пасеяў» .

Вядзеннем мікраблогу Зюганава у Twitter займаецца супрацоўнік прэс-службы Дзяніс Парфёнаў, растлумачылі ў прыёмнай лідэра КПРФ. Аднак сам Парфёнаў заявіў, што адказвае толькі за тэхнічную частку, а усе запісы яму асабіста надыктоўвае Зюганаў. «Мы слова ў слова перадаем тое, што кажа Генадзь Андрэевіч, самадзейнасцю не займаемся», - заявіў ён.

Афіцыйнай рэакцыі на выказванне Зюганава пакуль не было, аднак крыніцы газеты і ў Дзярждэпе і ў адміністрацыі прэзідэнта заявілі, што словы лідэра КПРФ пацягнуць за сабой меры ў адказ. Па словах суразмоўцаў выдання, рэакцыя Вашынгтона будзе пасля лістападаўскіх прэзідэнцкіх выбараў, прычым па-за залежнасці ад таго, застанецца ў Белым доме дэмакрат Барак Абама або яму на змену прыйдзе рэспубліканец Міт Ромні. У выпадку перамогі Ромні, выказалі здагадку крыніцы выдання, Генадзь Зюганаў можа быць падвергнуты «паказальным санкцыям», каб прадэманстраваць палітыкам іншых краін, што ЗША не дазволяць беспакарана абражаць сваю краіну і яе грамадзян.