Чыгуначныя квіткі на канец кастрычніка не прадаюць

Пасажыры не могуць загадзя аплаціць нават праезд да Гомеля, таму што да гэтага часу няма раскладу.

Расея думае над пераводам стрэлак гадзін на зімовы час. У мінулым годзе Беларусь услед за Расеяй засталася ў летнім часе. Потым навукоўцы падлічылі: беларусам і рускім лепш жыць усё ж такі ў зімовым часе і варта ў кастрычніку перавесці стрэлкі. А то грамадзяне ўстаюць у цемры, на працу едуць у цемры, ад гэтага колькасць ДТЗ расце і людзі больш хварэюць, паведамляе «Комсомольская правда в Беларуси».

Зрэшты, расейскія дэпутаты яшчэ не разгледзелі пытанне пераводу стрэлак. Не спяшаюцца прымаць рашэнне і ў нас.

- Я катэгарычна супраць пераводу туды-сюды. Добра, мы, дарослыя. Але мы ж дзяцей тузаем: ім у школу, у дзіцячы садок на гадзіну раней трэба, - пракаментаваў на днях праблему Аляксандр Лукашэнка. - А што тычыцца эканомікі, то наўрад ці мы ўжо нешта шмат выйграем. Гэта ж не Расея, дзе некалькі гадзінных паясоў. Таму я не прыхільнік круціць гадзінамі туды-сюды. Але, думаю, мы разам з расейцамі вызначымся, як нам паступіць у дадзеным выпадку.

А пакуль нявырашанасць пытання аб вяртанні зімовага часу ўжо прыносіць нязручнасці беларусам. На днях беларуская чыгунка ўслед за расейскай прыпыніла продаж квіткоў на цягнікі далёкага паведамлення, якія адпраўляюцца пасля 26 кастрычніка (нагадаем, раней менавіта ў гэты дзень і беларусы і расейцы дружна пераводзілі стрэлкі гадзін на адну гадзіну назад). Квіткі не прадаюць ні па тэрыторыі Беларусі, ні па СНД.

- Продажы закрыты абсалютна на ўсе цягнікі ў сувязі з рашэннем пытання пераводу часу на расейскай тэрыторыі. Як толькі гэтае пытанне вырашаць, продаж адновіцца, - распавёў намеснік начальніка пасажырскай службы БЧ Сяргей Мацкевіч.

Як растлумачылі ў БЧ, гэта зроблена для таго, каб не атрымалася такой сітуацыі, калі чалавек купіў квіток, прыйшоў на цягнік, а ён ужо сышоў. Бо расклад у выпадку пераходу на зімовы час зменіцца.