СК: Піліпец арыштаваны

Тым часам, па Гомелю ходзяць чуткі пра самагубства былога старшыні гарвыканкама.

Арыштаваны былы старшыня Гомельскага гарвыканкама Віктар Піліпец, які займае ў цяперашні час пасаду намесніка дырэктара УП «Гомельаграпрампраект», паведамілі агенцтву «Інтэрфакс-Захад» у сераду ў Следчым камітэце Беларусі.

«У дачыненні да Піліпца абраная мера стрымання ў выглядзе заключэння пад варту», - паведамілі ў СК.

«Ён быў затрыманы 19 верасня ў рамках расследавання крымінальнай справы ў дачыненні да службовых асоб прадпрыемства ўнітарнага камунальнага прадпрыемства «УКБ Гомельскага гарвыканкама», - растлумачылі ў СК. Яго дзеянні кваліфікаваныя па ч.3 арт.426 КК Беларусі (перавышэнне ўлады або службовых паўнамоцтваў). «У дачыненні да падазраванага выкарыстаная мера стрымання ў выглядзе заключэння пад варту», - дадалі ў камітэце.

Нагадаем, яшчэ 6 жніўня некаторыя інтэрнэт-рэсурсы паведамілі, што Віктар Піліпец, які на той момант працаваў старшынёй гарвыканкама, арыштаваны. Але 7 жніўня кіраўнік горада з'явіўся на працы, а гарвыканкам выступіў з афіцыйным аспрэчаннем інфармацыі аб затрыманні кіраўніка.

27 жніўня Віктар Піліпец быў вызвалены ад пасады старшыні Гомельскага гарвыканкама ў сувязі з пераходам на іншую працу. Адпаведнае распараджэнне падпісаў старшыня Гомельскага аблвыканкама Уладзімір Дворнік. Экс-старшыня гарвыканкама ўладкаваўся на пасаду намесніка дырэктара прадпрыемства «Гомельаграпрампраект».

З-за інфармацыйнага вакууму, створанага вакол імя нядаўняга кіраўніка горада, пра яго па Гомелю распаўзаюцца самыя злавесныя чуткі. У апошнія дні кажуць, ён здзейсніў самагубства і ўжо пахаваны.

Увечары аўторка ў рэдакцыю «Народной воли» звярнуўся выкладчык гомельскага ўніверсітэта, які прасіў не называць свайго імя, які распавёў, што на працягу дня ад самых розных людзей чуў пра смерць былога старшыні гарвыканкама.