У аэрапорце «Менск-2» кралі рэчы пасажыраў

Супрацоўніца службы авіяцыйнай бяспекі і рэжыму Нацыянальнага аэрапорта Менск здзяйсняла крадзяжы з багажу пасажыраў.

Кастрычніцкім (Менска) раённым аддзелам Следчага камітэта Беларусі пачалі крымінальную справу за крадзеж па частцы 1 артыкула 205 Крымінальнага кодэкса ў дачыненні да 21-гадовай ў дадзены момант непрацуючай жыхаркі Менска.

Як паведаміў БелаПАН прэс-сакратар упраўлення ўнутраных спраў на транспарце Аляксандр Марчанка, раніцай 8 жніўня менчанка, працуючы інспектарам службы авіяцыйнай бяспекі і рэжыму Нацыянальнага аэрапорта Менск, падчас надгляду багажу здзейсніла два крадзяжы. З валізкі 24-гадовай жыхаркі Менска яна выкрала туалетную ваду, пудру і лак для валасоў, а з валізкі 23-гадовай жыхаркі Гомеля - туалетную ваду. Прычыненая шкода ацэнена на суму звыш 740 тысяч рублёў. Выкрадзенае канфіскавана.