Саакашвілі запрасіў Лукашэнку ў Грузію

Аляксандр Лукашэнка спадзяецца на вяртанне Грузіі ў фармат СНД.

Дадзенае пытанне ён мае намер абмеркаваць з кіраўніцтвам Грузіі, ад якога атрымаў запрашэнне наведаць краіну з візітам. Пра гэта 15 студзеня заявіў беларускі кіраўнік на прэс-канферэнцыі для прадстаўнікоў беларускіх і замежных СМІ, піша РБК.

«У бліжэйшы час сам планую перагаварыць на гэтую тэму і з [прэзідэнтам Грузіі Міхаілам] Саакашвілі, і [прэм'ер-міністрам Бідзінай] Іванішвілі. Атрымаў запрашэнне ад Саакашвілі наведаць Грузію і, думаю, знайду час з ім сустрэцца», - сказаў Лукашэнка.

«Садружнасць - гэта зона інтарэсаў Грузіі», - сказаў ён. Пры гэтым Лукашэнка заўважыў, што пакуль не бачыць «гарачага жадання кіраўнікоў Грузіі рухацца ў гэтым напрамку», выказаўшы здагадку, што, мабыць, нехта на Захадзе стрымлівае грузінскае кіраўніцтва.

На яго думку, Грузіі не абавязкова ўваходзіць у ваенныя арганізацыі садружнасці. «Але рабіць нейкія крокі насустрач сваім суседзям трэба. Ну, з Расеяй не атрымліваецца ў сілу нейкіх там абставінаў. Але для таго, каб выкарыстоўваць гэтую пляцоўку і па-чалавечы размаўляць і з намі, і з Расеяй - гэта ж магчыма. Навошта гэта адкідаць. Таму я за гэты працэс», - сказаў Лукашэнка.