Лукашэнка едзе выпрошваць у Назарбаева нафту

Беларусь можа разлічваць на танную казахскую нафту як альтэрнатыву расейскай.

Такім чынам эканаміст Барыс Жэліба пракаментаваў сайту charter97.org візіт Лукашэнкі ў Казахстан.

«У СМІ канкрэтнага парадку перамоваў паміж Аляксандрам Лукашэнкам і Нурсултанам Назарбаевым я не бачыў. Таму нам застаецца толькі здагадвацца, што яны будуць абмяркоўваць. Але зрабіць гэта можна. Па-першае, трэба павысіць тавараабарот, таму што з Расеяй і Казахстанам тавараабарот паменшыўся. І, вядома, Лукашэнка будзе прапаноўваць Назарбаеву купіць такія традыцыйныя тавары беларускага экспарту, як трактары, МАЗы, сельгастэхніку і гэтак далей. Вядома, што склады нашых прадпрыемстваў затавараныя гэтай прадукцыяй. А Казахстан - краіна вельмі вялікая і цалінная. І на такіх тэрыторыях ёсць, дзе разгуляцца тэхніцы і аўтамабілям. Па-другое, трэба, вядома, прапанаваць набыць калійныя ўгнаенні і іншыя тавары традыцыйнага беларускага экспарту. Казахстан з'яўляецца даволі развітай краінай, якая можа паставіць Беларусі што-небудзь з машынабудавання, ну і, вядома, трохі гіпатэтычна - нафту», - лічыць эксперт.

Эканаміст адзначыў, што Казахстан мае сваю нафту, а Расея ў гэтым плане для Беларусі заўсёды застаецца манапалістам, і таму трэба шукаць іншыя крыніцы.

«Беларусь зрабіла няўдалыя спробы з Азербайджанам і Венесуэлай. А Казахстан, вядома, далей, чым Азербайджан, але ўсё-такі ён знаходзіцца ў Мытным саюзе. Таму можна разлічваць на танную нафту, можа быць, і бяспошлінную, як расейскую. Але справа ў тым, што яна можа быць пастаўленая толькі праз расейскія нафтаправоды. Я думаю, што трэба неяк будыраваць дадзенае пытанне. Можа быць, атрымаецца сысці ад гэтага манапалізму Расеі», - Барыс Жэліба.

Эксперт выказаў здагадку, што кіраўнікі будуць абмяркоўваць і іншыя пытанні супрацоўніцтва.

«Гэта на карысць абодвум краінам. Тым больш, што Казахстан робіць пэўныя поспехі, і там ёсць, чаму павучыцца. Нягледзячы на тое, што ўлада Назарбаева таксама аўтарытарная, але ўсё-такі ён не ізаляваў краіну ад Захаду. Туды ідзе заходні капітал, і Казахстан не выглядае так ізалявана, як Беларусь. Таму Лукашэнку трэба павучыцца ў Назарбаева свабодзе прадпрымальніцтва, свабодзе рынку і рынкавых стандартаў, чаго няма ў Беларусі», - перакананы эканаміст.

Нагадаем, 3-4 кастрычніка Нурсултан Назарбаеў правядзе двухбаковыя перамовы з Аляксандрам Лукашэнкам, які прыбывае з афіцыйным візітам у Астану.

Фота: РІА «Новости»