Мясніковіч: Паўсюдная эканомія павінна быць нормай жыцця

Прэм'ер-міністр заклікае эканоміць на ўсім.

Аляксандр Лукашэнка сёння прыняў з дакладам прэм'ер-міністра Міхаіла Мясніковіча. Як паведамляе БелТА, на сустрэчы абмяркоўваліся сітуацыя ў эканоміцы, ход мадэрнізацыі прадпрыемстваў і іншыя пытанні.

Што да эканамічнай сітуацыі ў краіне, то ўрад адзначае сур'ёзны недабор бюджэтных паступленняў, але за кошт аптымізацыі выдаткаў па выніках года чакаецца невялікі дэфіцыт бюджэту. «Аптымізацыя выдаткаў, паўсюдная эканомія павінны быць нормай жыцця», - сказаў прэм'ер-міністр.

У сувязі з гэтым Аляксандр Лукашэнка падвергнуў урад крытыцы за тое, што на месцах ёсць яшчэ шмат неарганізаванасці і неакуратнага стаўлення да расходавання бюджэтных сродкаў.

Лукашэнку таксама было даложана аб мадэрнізацыі. За 8 месяцаў бягучага года на гэтыя мэты накіравана 95 трлн пры гадавым плане каля 120 трлн. Працэс мадэрнізацыі, у прыватнасці, паспяхова рэалізуецца на БелАЗе, БМЗ, нафтаперапрацоўчых заводах. Ён падкрэсліў, што сродкі на мадэрнізацыю павінны ўкладвацца выключна ў эфектыўныя праекты.