СК пацвердзіў затрыманне даверанай асобы Чыжа

Зміцер Алексін узяты пад варту ў межах расследавання крымінальнай справы супраць намесніка старшыні «Белнафтахіма».

Пра гэта сайту charter97.org паведаміла афіцыйны прадстаўнік Следчага камітэта Юлія Ганчарова.

«У рамках расследавання крымінальнай справы ў дачыненні да намесніка старшыні канцэрна «Белнафтахім» у якасці падазраванага прыцягнуты і заснавальнік шэрагу прадпрыемстваў, якія займаюцца рэалізацыяй нафтапрадуктаў Зміцер Алексін», - заявіла яна.

Расследаванне справы працягваецца.

Першым пра арышт набліжанага да алігарха Юрыя Чыжа бізнесмена паведаміў учора ўвечары сайт charter97.org. Крыніца, блізкая да бізнесу «кашалька» Лукашэнкі, таксама адзначыла, што затрыманне звязанае са справай намесніка дырэктара «Белнафтахіма» Уладзіміра Волкава.

Зміцер Алексін - непублічная персона і вядомы толькі як чалавек, які пасля ўвядзення санкцый супраць алігарха Юрыя Чыжа стаў фармальным уладальнікам некаторых яго актываў у ЕЗ. Так, актывы фірмы Neonafta (СП ТАА «Неанафта») у Латвіі пасля ўвядзення санкцый былі перададзеныя Змітру Алексіну (яму належыць 40% доляй капіталу), Іне Алексінай (40%) і вядомаму ў Даўгаўпілсе бізнесмену Аляксандру Грахоўскаму (20%). Алексіны сталі суўласнікамі прадпрыемства па вытворчасці біягаручага Mamas D і бровара Latgales Alus D. Раней сын і маці Алексіны кіравалі рэстаранам «Сябры», які належыць Чыжу.