Суд у Гаазе: Кіраўніка выведкі Лібіі трэба судзіць на радзіме
2- 11.10.2013, 22:05
- 5,295
Былога кіраўніка выведнай службы Лібіі Абдулу Сенусі трэба судзіць на радзіме, а не ў Гаазе.
Пастанову пра гэта прыняў Міжнародны крымінальны суд, перадае BBC.
Згодна з Рымскі статутам, асноўным дакументам Міжнароднага крымінальнага суда (МКС), суд не можа праводзіць разбіральніцтва ў дачыненні да падазраваных, чые справы можа разгледзець справядлівы суд у роднай краіне.
Абдула Сенусі быў адной з найбольш уплывовых дзяржаўных асоб эпохі Кадафі. У 2011 годзе яго абвінавацілі ў ваенных злачынствах у часе паўстання, што прычынілася да падзення рэжыму Кадафі.
У мінулым годзе Сенусі быў выдадзены Лібіі Маўрытаніяй.
Адвакат Сенусі Бэн Эмэрсан заявіў, што шакаваны пастановай суда ў Гаазе. «Лібійская судовая сістэма раскіданая, і суды не здольныя разглядаць справы былых чыноўнікаў рэжыму Кадафі», - адзначыў юрыст.
Дасудовая палата ў складзе МКС прыняла пастанову, што Лібія жадае і здольная самастойна правесці расследаванне справы Сенусі.
Справа супраць сына палкоўніка
У заяве суда гаворыцца, што гэтая пастанова ніяк не звязаная са справай Саіф аль-Іслама Кадафі. Сын нябожчыка дыктатара таксама абвінавачваецца ў ваенных злачынствах і з'яўляецца суадказнікам разам з 36 іншымі асобамі ў справе Сенусі.
У заяве МКС таксама гаворыцца, што Лібія не змагла даць пераканаўчых довадаў у справе сына Кадафі і забяспечыць яму юрыдычную падтрымку.
24 кастрычніка суд у Трыпалі павінен пастанавіць, ці выстаўляць абвінавачванні супраць Кадафі і Сенусі, а таксама 20 іншых высокапастаўленых асоб зрынутага рэжыму. Іх могуць абвінаваціць у забойствах удзельнікаў антыўрадавых выступаў у 2011 годзе.
Саіф Кадафі ўтрымліваецца паўстанцамі ў горадзе Зінтан на захадзе Лібіі. У верасні паўстанцы адмовіліся даставіць яго на судовае пасяджэнне ў Трыпалі.
Абдула Сенусі быў датычны да масавых забойстваў зняволеных палітычнай турмы «Абу-Салім» у Трыпалі ў 1996 годзе.
У 1999 годзе Сенусі завочна судзілі ў Францыі за ягоную ролю ў загубе французскага авіялайнера, збітага ў Нігеры за дзесяць гадоў дагэтуль. Ён быў прысуджаны тады да пажыццёвага зняволення.
Фота: Reuters