Сілавікі пакрываюць магілёўскага «вертыкальшчыка»

П'яны чыноўнік трапіў у ДТЗ і схаваўся.

Прадстаўнікі сілавых структур аказваюць ціск на супрацоўнікаў ДАІ, якія затрымалі чыноўніка пасля здзяйснення ім ДТЗ.

1 кастрычніка ў гарадскім пасёлку Краснаполле Магілёўскай вобласці прайшлі святочныя мерапрыемствы, прысвечаныя 70-годдзю вызвалення раёна ад нямецка-фашысцкіх захопнікаў і ўсталявання помніка да гэтай знамянальнай даты ў выглядзе баявой машыны дэсанту, піша сайт ПЦ «Вясна».

Пасля заканчэння афіцыйнай часткі мерапрыемства высокія госці з кіраўніцтва ўзброеных сіл Рэспублікі Беларусь і кіраўніцтва Краснапольскага раёна працягнулі адзначаць свята ў мясцовым рэстаране «Сосны», паведамляе незалежная крычаўская газета «Вольный город».

Ну а некалькімі гадзінамі пазней намеснік старшыні Краснапольскага райвыканкама Мікалай Лістападаў здзейсніў ДТЗ на службовым аўтамабілі «Жыгулі» і пасля гэтага паспрабаваў схавацца з месца здарэння. Аднак здзейсніць уцёкі чыноўніку не ўдалося, ён быў аператыўна затрыманы супрацоўнікамі ДАІ, якія даставілі высокага раённага чыноўніка на медыцынскі агляд у мясцовую бальніцу. Тэст на алкаголь адназначна пацвердзіў, што чыноўнік знаходзіцца ў нецвярозым стане.

Па словах журналістаў, самыя цікавыя падзеі разгарнуліся пазней - прадстаўнікі сілавых структур пачалі ціснуць на супрацоўнікаў ДАІ, якія затрымлівалі намесніка старшыні Краснапольскага райвыканкама і лекараў, якія ўдзельнічалі ў медыцынскім аглядзе Мікалая Лістападава, пачаліся праверкі законнасці і абгрунтаванасці іх дзеянняў. Уся інфармацыя аб ДТЗ была аператыўна вынятая з электронных носьбітаў інфармацыі. Здзейсніўшы злоснае парушэнне закона, чыноўнік працягвае працаваць на сваёй пасадзе.

«Увесь гэты ціск і імкненне загладзіць сітуацыю адбываюцца таму, што камусьці наверсе вельмі нявыгадна, каб высветліліся падрабязнасці аб здзейсненым чыноўнікам ДТЗ, - выказвае меркаванне журналіст газеты. - Улады не хочуць, каб выйшла інфармацыя, дзе і з кім прымудрыўся напіцца Мікалай Лістападаў, і як ён апынуўся за рулём службовага аўтамабіля. Аднак, згодна з нашай інфармацыяй, супрацоўнік ДАІ, які затрымліваў раённага начальніка, дзейнічаў у строгай адпаведнасці з законам і не перавышаў службовых паўнамоцтваў ніякім чынам. Пакуль не магу адказаць, ці змаглі прадстаўнікі сілавых структур знайсці нейкія парушэнні ў дзеяннях лекараў, якія праводзілі медыцынскі агляд намесніка старшыні Краснапольскага райвыканкама, ведаю толькі, што ціск на галоўнага лекара быў вельмі моцны».

У святкаванні 70-й гадавіны вызвалення Краснапольскага раёна ад нямецка-фашысцкіх захопнікаў 1 кастрычніка прымалі ўдзел намеснік міністра абароны Рэспублікі Беларусь па ўзбраенні генерал-маёр І. Лацянкоў, камандуючы сіламі спецыяльных аперацый Узброеных Сіл генерал-маёр А. Белаконеў і намеснік камандуючага сіламі спецыяльных аперацый па ідэалагічнай працы палкоўнік С. Андрэеў.