Чэрчыля прызналі аўтарам самай дасціпнай абразы

Былы прэм'ер-міністр Вялікабрытаніі прызнаны аўтарам самай дасціпнай абразы ў гісторыі.

Такія вынікі паказала апытанне, прымеркаванае да выхаду фільма пра скандальнага амерыканскага піяніста і спевака Ліберачэ, піша Lenta.ru.

Першае месца паводле вынікаў апытання заняў адказ Ўінстана Чэрчыля на заўвагу парламентарыя Бэсі Брэдак, якая папракнула яго ў тым, што ён п'яны. «Даражэнькая, а вы страхоцце. Але я пад ранне працверазею, а вы так і застаняцеся страхоццем», - сказаў прэм'ер.

Пры гэтым у лік найбольш дасціпных абраз патрапіла яшчэ адно выказванне палітыка. Гаворка ідзе пра фразу, кінутую ім у адрас лорда-ахоўніка друку, які патрабаваў неадкладнай сустрэчы з прэм'ерам, хоць той сядзеў у прыбіральні. «Скажыце яму, што я не магу займацца двума кавалкамі лайна адначасова», - заявіў тады Чэрчыль. Гэтая фраза заняла паводле вынікаў апытання пятае месца.

На другое месца апытаныя паставілі прэзідэнта ЗША Барака Абаму, які заявіў на адрас губернатара Аляскі Сары Пэйлін, што «свіння застаецца свіннёй, колькі яе памадай не намазвай». Выказванне самога Ліберачэ апынулася ў спісе на трэцім месцы. Апытаным спадабаўся яго каментар да знішчальнай рэцэнзіі на выступ музыкі. «Дзякуй за такі займальны артыкул. Прачытаўшы яго, я смяяўся ўсю дарогу да банка», - сказаў піяніст аўтару матэрыялу.

У спіс таксама патрапілі фразы братоў Галахераў з гурта Oasis. Так, Наэль Галахер на пытанне пра спевака Робі Уільямса адказаў: «Вы пра таго тлустага танцора з Take That?» У сваю чаргу Ліам Галахер грэбліва адазваўся аб планах былой салісткі Spice Girls Вікторыі Бэкхэм напісаць кнігу. «Ды яна не ўмее нават жаваць жуйку і хадзіць наўпрост, якая ўжо тут кніга», - заявіў ён.

Апытаныя таксама адзначылі фразу коміка Граўча Маркса, які сказаў пра нейкую жанчыну, што сваімі выдатным выглядам яна абавязаная бацьку, які працуе пластычных хірургам. Акрамя таго, у спіс увайшлі выказванні акторкі і спявачкі Бэці Мідлер, якая заявіла, што прынцэса Ганна «любіць прыроду нягледзячы на тое, што яна з ёй зрабіла», і Фрэнка Сінатры, які пакпіў у адрас Роберта Рэдфарда. «Прынамсі, ён знайшоў сваю сапраўдную любоў. Як шкада, што ён не можа ажаніцца сам з сабою», - сказаў музыка.

Ўінстан Чэрчыль быў вядомы як пераканаўчы і дасціпны прамоўца. Пры гэтым інцыдэнт з Бесі Брэдак быў далёка не адзіным выпадкам, калі яго бачылі п'яным. У прыватнасці, многія брытанцы мяркуюць, што і свае знакамітыя прамовы падчас Другой сусветнай вайны ён прамаўляў нецвярозым.

Фота: coldwar.ru