Сечын гатовы выкупіць Мазырскі НПЗ

«Раснафта» зацікаўленая ў набыцці пакета акцый Мазырскага НПЗ, які належыць ураду Беларусі.

Пра гэта паведаміў журналістам кіраўнік «Раснафты» Ігар Сечын, перадае ІТАР-ТАСС.

Ён адзначыў, што кампаніі цікавы гэты актыў. «Мы ўжо там прысутнічаем (заўв. праз залежную «Славнафту»). Усё астатняе залежыць ад умоў продажу», - дадаў кіраўнік «Раснафты».

Раней кіраўнік «Газпрам нафты» Аляксандр Дзюкаў таксама заяўляў, што пакет у Мазыры цікавы кампаніі.

«Раснафта» і «Газпрам нафта» парытэтна валодаюць сумесным прадпрыемствам «Славнафта», якому належыць значны пакет акцый беларускага НПЗ у Мазыры.

9 кастрычніка Дзяржаўны камітэт па маёмасці Беларусі абвясціў аб правядзенні работ па продажы на аўкцыёнах і па конкурсе акцый (долей) акцыянерных (гаспадарчых) таварыстваў і прадпрыемстваў, якія належаць Рэспубліцы Беларусь, як маёмасных комплексаў. Плануецца прадаць акцыі больш 80 прадпрыемстваў, у тым ліку ААТ «Мазырскі НПЗ» (42,76%).

«Газпрам нафта» разам з «Раснафтай» праз «Славнафту» валодаюць на парытэтных пачатках 42,58% акцый Мазырскага НПЗ, 2,41% акцый належыць фізічным асобам. У ліку зацікаўленых у куплі завода эксперты называюць таксама «Лукойл» і «Сургутнафтагаз».

Згодна з умовамі, пераможца конкурсу павінен забяспечыць на працягу пяці гадоў з даты заключэння дамовы куплі-продажу поўную загрузку вытворчых магутнасцяў вуглевадароднай сыравінай, а ўнутранага рынку Беларусі - маторнымі відамі паліва (аўтабензіны Аі-92, Аі-95, дызельнае паліва), а таксама асвятляльным керасінам, печкавым палівам, нафтавым бітумам, звадкаваным газам, нафтавым бензолам, тэхнічнай серай ў аб'ёмах, штомесяц узгодненых з канцэрнам «Белнафтахім».

Акрамя таго, на працягу гэтага тэрміну пераможца павінен забяспечыць рэалізацыю ў поўным аб'ёме інвестыцыйных праектаў, прадугледжаных праграмай развіцця ААТ «Мазырскі НПЗ» на 2011-2015 гады з перспектывай да 2020 года. Колькасць працуючых пры новым уладальнікам павінна быць не менш за 4613 чалавек, а ўзровень сярэднямесячнай заработнай платы - не ніжэй сярэдняй па галіне.

Фота: rus.ruvr.ru