Радзькоў: Няма грошай на рэпетытара - ідзі ў аграномы

Былы міністр адукацыі паскардзіўся на недабор студэнтаў у сельскагаспадарчыя ВНУ.

Аляксандр Радзькоў, першы намеснік кіраўніка адміністрацыі Лукашэнкі і старшыня рэспубліканскага грамадскага аб'яднання «Белая Русь» прапанаваў варыянт вырашэння гэтай праблемы, піша БелТА.

«У гэтым годзе мы заўважылі, што на фізіка-матэматычных факультэтах педагагічных універсітэтаў недабор», - прывёў прыклад Аляксандр Радзькоў. Ён звярнуў увагу, што цяпер нярэдка скардзяцца, што ў ВНУ паступіць цяжка, трэба наймаць рэпетытара і гэтак далей. «Калі ласка, ідзі не толькі на фізмат. У сельскагаспадарчых ВНУ таксама недабор», - сказаў чыноўнік. І падзяліўся сваім меркаваннем, чаму вырашыць праблему недабору на гэтыя спецыяльнасці наўрад ці можна, павялічыўшы стыпендыю або падаўшы ўсім інтэрнаты. «Чаму не пойдуць? Таму што сучасная моладзь - прагматыкі», - адзначыў ён.

У той час як ёсць недахоп моладзі пры наборы на згаданыя спецыяльнасці, у БДУІР, напрыклад, праблем з недаборам на праграмістаў няма. Больш таго, тыя, хто можа вучыцца на бюджэце на інжынера-электроніка, нярэдка ідуць вучыцца на праграмістаў на платныя месцы, каб потым выгадна ўладкавацца ў IT-сферы. «Раней паступіў у ВНУ - гэта было шчасце. А зараз яны глядзяць, што на выхадзе», - сказаў Радзькоў.

Аляксандр Радзькоў адзначыў, што адзін з варыянтаў вырашэння такіх праблем - гэта пошук дзяцей, схільных да працы ў той ці іншай сферы літаральна з дзіцячага садку. Неабходна прыцягваць моладзь на педагагічныя спецыяльнасці. «Навучанне матэматыцы і фізіцы - гэта забеспячэнне нацыянальнай бяспекі», - падкрэсліў кіраўнік «Белай Русі».