Блазны расстралялі мексіканскага наркабарона
18- 20.10.2013, 8:15
- 19,457
Невядомыя ў касцюмах блазнаў застрэлілі былога кіраўніка наркакартэля «Ціхуана» Франсіска Рафаэля Арэльяна-Фэлікса.
Забойства адбылося падчас дзіцячага свята ў пятніцу на курорце Лос Кабас у мексіканскім штаце Ніжняя Каліфорнія, паведамляе BBC.
Больш як 20 гадоў сям'я Арэльяна-Фэлікс - шэсць братоў і чатыры сястры - кантралявалі пастаўкі какаіну і марыхуаны ў ЗША, але росквіт картэля «Ціхуана» прыйшоўся на пачатак 90-х гадоў мінулага стагоддзя - затым праз паспяховыя аперацыі паліцыі яго магутнасць істотна аслабла.
Сам Франсіска Рафаэль адсядзеў 15 гадоў у мексіканскіх і амерыканскіх турмах і выйшаў на волю ў 2008 годзе.
У жніўні гэтага года ў ЗША прысудзілі да 15 гадоў зняволення яго брата Эдуарда, арыштаванага ў Мексіцы яшчэ ў 2008 годзе і праз чатыры гады выдадзенага Злучаным Штатам.
Бенхамін і Франсіска Хаўер Арэльяна-Фэлікс ужо адбываюць працяглыя тэрміны зняволення, а яшчэ адзін брат, Рамон, быў забіты ў перастрэлцы з паліцыяй у 2002 годзе.
На волі застаецца толькі Карлас Арэльяна-Фэлікс, але лічыцца, што цяпер «Ціхуану» кантралююць яго сястра Энедзіна і яе сын Луіс Фернанда, які ўзяў прозвішча маці Арэльяна-Фэлікс.