ЧС у Расеі - трыумф карупцыі (Відэа)

Сёння мала хто ўспамінае пра першынства 2018 года, арганізацыя якога была давераная Расеі.

На фоне спрэчак вакол Зімовых Алімпійскіх гульняў у Сочы і палемікі з нагоды Чэмпіянату свету па футболе ў Катары запланаванае ў Расеі сусветнае футбольнае першынство не выклікае да сябе асаблівай увагі. Але, можа быць, дарэмна?

Сёння, калі ўсе газеты пішуць аб ускладненнях ў Катары (там павінен прайсці Чэмпіянат свету 2022 года), а выканаўчы камітэт ФІФА праводзіць 3 і 4 кастрычніка спецыяльны сход для абмеркавання магчымага пераносу спаборніцтваў на зіму, мала хто ўспамінае пра першынство 2018 года, арганізацыя якога была давераная Расеі. Хоць Уладзімір Пуцін і нахвальвае станоўчае ўздзеянне Чэмпіянату свету на здароўе нацыі, у Расеі ўсё таксама зусім не бясхмарна, піша «France info».

Праекты каласальных маштабаў, як і ў Катары

Пабудаваць стадыён на востраве сабраліся не толькі ў Катары. Расея сур'езна разглядала падобны праект, пакуль паводкі ў Самары не прымусілі ўлады аддаць перавагу ўчастку паміж адгалінаваннем аўтамагістралі і аэрапортам. Менш гламура, але і менш выдаткаў. Як бы там ні было, у маштабнасці расейскім планам ніяк не адмовіш. Сем новых стадыёнаў, чатыры рэканструкцыі, 19 000 новых гасцінічных нумароў у адной толькі Маскве, лініі метро ў паўтузіне расейскіх гарадоў, россып міжнародных аэрапортаў: краіна імкнецца скарыстацца спаборніцтвамі для абнаўлення інфраструктуры, значная частка якой засталася яшчэ з савецкіх часоў.

Выдаткі б'юць усе рэкорды, як і ў Катары

Падчас прысуджэння Расеі права на правядзенне Чэмпіянату свету 2018 года кошт праекта ацэньваўся ў 10 мільярдаў еўра. Сёння ж лічыльнік набліжаецца ўжо да другога дзесятку. Больш за тое, на думку адваката Стывена Козенса (Stephen Cozens), да пачатку спаборніцтваў агульная сума выдаткаў можа скласці 50 мільярдаў еўра або 2% расейскага ВУП. Буйныя расейскія прадпрыемствы, якім і так ужо даводзіцца спансіраваць Алімпіяду ў Сочы, разумеюць, што ўрад чакае ад іх удзелу ў фінансаванні стадыёнаў. Будаўніцтва стадыёна ў Санкт-Пецярбургу ўяўляе сабой паказальны выпадак таго, што можа здарыцца з усім расейскім праектам (работы на шасці стадыёнах так і не зрушыліся з мёртвай кропкі). За перыяд з 2007 па 2012 год будаўнікі не зрабілі амаль нічога, аднак кошт павялічыўся ў дзесяць разоў, ператварыўшы будучы стадыён у самы дарагі спартыўны комплекс у свеце. Усё знаходзіцца ў тым жа стане, што і два гады таму, сказаў расейскі прэм'ер Дзмітрый Мядзведзеў. Мясцовы губернатар у сваю чаргу звярнуўся да футбольных заўзятараў з просьбай аказаць дапамогу (зразумела, на добраахвотных пачатках) на будоўлі. Тыя ў адказ параілі яму прадаць яго лецішча.

Падазрэнні ў карупцыі, як і ў Катары

Рашэнне прысудзіць Расеі права правядзення Чэмпіянату свету 2018 года выклікала пэўныя сумневы, аднак іх нельга параўноўваць з шуміхай у СМІ з нагоды перамогі Катара ў барацьбе за чэмпіянат 2022 года. Тым не менш, кіраўнік следчага ўпраўлення ФІФА Майкл Гарсія (Michael Garcia) мае намер разабрацца з падазрэннямі з нагоды перамогі Расеі, якія ўключаюць у сябе магчымы ўзлом кампутараў англійскага боку і ўздзеянне на камісію. У Расеі адказалі, што ім няма чаго хаваць. Ды няўжо? «Прадстаўнікам Расеі было вядома, што яны атрымалі права на правядзенне Чэмпіянату свету 2018 года, яшчэ за тыдзень да галасавання», - піша Люк Хардзінг (Luke Harding) у кнізе «Мафіёзная дзяржава» (Mafia State).

Цяжкія ўмовы працы, як і ў Катары

Самагубствы рабочых з-за наймоцнай эксплуатацыі на будаўніцтве стадыёнаў у Катары прыцягнулі да сябе вялікую ўвагу прэсы. У Расеі ўсё не так дрэнна: на футбольных будоўлях загінулі трое рабочых (у Казані, у Маскве і Санкт-Пецярбургу). Як бы там ні было, на алімпійскіх аб'ектах імігранты з былых братэрскіх савецкіх рэспублік працуюць у поце чала за мізэрную зарплату, і падобная сітуацыя цалкам можа паўтарыцца ў будучыні. Па словах віцэ-прэм'ера Дзмітрыя Козака, якому даручанае шэфства над падрыхтоўкай Алімпіяды, цяпер на будаўніцтве занятыя 96000 рабочых, каля 500 кампаній-субпадрадчыкаў, працы вядуцца прыкладна на 800 аб'ектах капітальнага будаўніцтва: у такіх умовах пазбегнуць інцыдэнтаў падобнага роду наўрад ці магчыма. Катарскі бок прыводзіць у сваё апраўданне практычна ідэнтычныя аргументы.

Пераклад: Inosmi.ru

Фота: РІА Новости, Аляксей Даніч