Праспект Пераможцаў у Менску хочуць ушчыльніць

У Менску плануюць заняцца ўшчыльненнем адной з самых «зялёных» транспартных артэрый горада.

Левы бок праспекта паміж вуліцай Мельнікайтэ і праспектам Машэрава пакуль забудаваны не настолькі часта, як таго хацелася б аматарам гарадскіх ушчыльненняў. Нядаўна побач з гасцініцай «Планета» вырас гіганцкі жылы комплекс «Славянскі квартал». Кампазіцыя з шматузроўневых і мульты функцыянальных будынкаў рознай вышыні, як адзначаў забудоўшчык, «не мае на сённяшні дзень аналагаў у горадзе», а таму «стане прыкметнай з'явай у фарміраванні сучаснага архітэктурнага аблічча сталіцы», піша interfax.by.

Аднак паміж гасцініцай «Планета» і праспектам Пераможцаў яшчэ засталося незанятая прастора. Прасторны газон з дрэўцамі, у дні вайсковых парадаў і канцэртаў да Дня Незалежнасці ператвараўся ў імправізаваную глядацкую трыбуну, камусьці літаральна мазоліў вочы. Сапраўды, чаму гэта фактычна ў цэнтры Менска, у двух кроках ад ажыўленага праспекта, пустуе зямля?! Менчукі дачакаліся: архітэктары прадставілі сваё бачанне забудовы гэтай зялёнай зоны. Гэтыя работы былі прадстаўленыя на X Нацыянальным фестывалі архітэктуры «Менск-2013».

Інстытут «Менскграмадзянпраект» прадставіў перадпраектную прапрацоўку шмат функцыянальнага комплексу з размяшчэннем гасцініцы, гандлёва-забаўляльных аб'ектаў.

Мяркуючы па ілюстрацыях, калі нешта падобнае будзе ўвасобленае ў жыццё, то гасцініца «Планета» будзе акружаная іншымі будынкамі, хай і меншай паверхавасці. Спераду - з боку праспекта Пераможцаў - сяміпавярховы, па меншай меры, так відаць з эскіза; ззаду - большай паверхавасці.

Паміж імі - мабыць, як раз тыя самыя «гандлёва-забаўляльныя аб'екты», якія займаюць усю прастору паміж новабудоўлямі.

Мы бачым, што «Планету» будучы комплекс літаральна абступае з усіх бакоў.

Дабрацца да гасцініцы на аўтамабілі можна будзе толькі праз прасвет паміж комплексам «Славянскі квартал» і будучым гандлёва-забаўляльным аб'ектам.

А вось і іншае архітэктурнае рашэнне. «Планету» з боку праспекта Пераможцаў відаць лепш, паколькі асноўная паверхавасць новай забудовы прыходзіцца на пляцоўку, якая прымыкае да праспекта Машэрава.

Нягледзячы на тое, што гіганцкіх будынкаў гэты праект не прадугледжвае, прыродная натуральнасць тэрыторыі ўсё роўна будзе страчаная. Больш за тое, пасярэдзіне былога газона мяркуецца вырыць нейкае паглыбленне (гл. фота) пакуль не зразумелага прызначэння. Падобна на сцэнічную пляцоўку.

Не застанецца без змен і зялёная зона па іншы бок праспекта Машэрава. Там цяпер растуць дрэвы, разбіты клумбы, а ў глыбіні ўчастку віднеецца камбінат бытавога абслугоўвання.

Архітэктары распрацавалі праект рэканструкцыі існуючага Дома быту з прыбудовай гандлёва-офісных памяшканняў.

Прыбудова невысокая, але прасторная. Прычым, яе плошча будзе куды больш, чым плошча Дома быту.

Вакол комплексу архітэктары прапануюць зладзіць адкрыты паркінг.

Дарэчы, аўтары праектных рашэнняў падкрэсліваюць, што скрыжаванне праспектаў Машэрава і Пераможцаў «з'яўляецца ідэалагічным цэнтрам Менска, месцам правядзення святочных парадаў». Як у гэтую канцэпцыю ўпісваюцца гандлёва-забаўляльныя цэнтры і офісы, складана сказаць. Але, можа быць, з буціка за парадам назіраць больш прыемна, чым седзячы на траве. Спецыялістам лепш відаць.

***

Праспект Пераможцаў, былы праспект Машэрава, яшчэ раней - Паркавая магістраль - супер-доўгайграючы архітэктурны праект. Яго рэалізацыя пачалася ў другой палове 1960-х, калі стала зразумела, што гістарычны цэнтр Менска не спраўляецца з патрэбамі імклівага расту горада. Шкляны будынак інстытута «Белпрампраект» у перасячэння з вуліцай Няміга быў узведзены ў 1967-1969-х і абумовіў лёс будучага праспекта.

Палац спорту, тры вышынных будынкі, якія стаяць перпендыкулярна да трасы, гмах гасцініцы «Юбілейная», Дом прафесійных саюзаў, Дом праектных арганізацый, гасцініца «Планета - усе гэтыя аб'екты ўзводзіліся да сярэдзіны 1980-х. А ў 1985 годзе ў парку Перамогі быў узведзены манумент «Менск - горад-герой», які стаў, як кажуць архітэктары, кампазіцыйнай дамінантай магістралі.

Хтосьці думаў, што на гэтым пастаўлена кропка. Аказалася, не. Вось толькі якую ролю згуляе планаванае ўшчыльненне праспекта Пераможцаў у лёсе згаданага архітэктурнага ансамбля? Гарманічна дапоўніць ці, наадварот, разбурыць?